Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,015 Auteur: Giraut de Bornelh Genre: Canso (chanson de croisade?) Numero: LXX

Era, can vei reverdezitz

I	1	Era, can vei reverdezitz
		Los vergers e cobra l’estatz,
		Me tira·l cor plus vas solatz;
		Que, can se dezaguiza l’ans
	5	E·l jois e·l chans
		Dels auzels e·l deportz e·l critz,
		Es m’us envitz
		De chantar, per qu’eu m’esbaudei.
		Pero si vei
	10	Mantas res de que sui iratz
		E plus, car a paias malvatz,
		Enics e fenhs, fals e felos
		Es lo sanhs sepulcres restatz,
		Que no·ls ensec clams ni tensos.
II	15	Pero, can Deus es obezitz,
		No·s tarza·l gazardos ni·l gratz,
		Car qui ben am’, es ben amatz;
		Que l’amors dobla·ls bos talans,
		E fai se grans
	20	De bo cor us be-fachs petitz,
		Can es grazitz.
		Per qu’enten om que ben estei
		C’al maior rei,
		Cui no contrasta poestatz,
	25	Se vir la bona volontatz
		E·l bo cor e la sospeissos?
		Car cel que peza sos pechatz,
		Es ades benignes e bos.
III		E donc be degr’esser servitz
	30	Tan francs senher e tan onratz!
		Que mostra com lo serviatz
		Qu’el apodera·ls sols esmans
		Que·l fortz jaians
		Contra cui se levet Davitz
	35	Era garnitz.
		So trobam, de forsor arnei
		E, fe que·us dei,
		Car s’era contra Deu levatz,
		Remas el cham apoderatz;
	40	Qu’eu n’ai ja vist aramir dos
		De que·l plus fortz es plus grevatz
		E·l plus frevols plus poderos.
IV		Era, que Deus en sia guitz,
		Repaire fes e venha patz
	45	E ferm se valors e vertatz.
		De que ja crolav’us grans pans,
		E gens bobans
		Qu’eu cre, si sai no fos ganditz,
		Que fos falhitz;
	50	Mas era cobrara so drei,
		En can eu vei,
		Pos lo reis Richartz es passatz,
		E pos el es lai aribatz
		N’i a tans valens companhos,
	55	Derga so chap crestiandatz,
		C’un petit l’a trop baissat jos!
V		Et a que fo va cor noiritz
		Ni don li crec bes ni rictatz?
		Cudatz c’avers fos ajostatz
	60	Que·s cregues ni·s dobles engans?
		Non es semblans!
		Mas, desque seri’acolhitz,
		Fos gen partitz,
		Ses desmezur’e ses desrei,
	65	Que no·s parei
		Lo vilas ni·l ben ensenhatz;
		C’aissi deu·l dos esser blasmatz,
		S’aicel que·l pren no·s fai lo dos,
		Com deu esser gen razonatz,
	70	Can sens lo chabdel’e razos.
VI		Per qu’eu vauc, can m’en sui partitz
		De mon plus adrechs, apensatz
		E, pos no·n posc esser paiatz
		Ni gais ni conhdes ni prezans.
	75	Ans sui clamans,
		Car del chantar no·m sui gequitz!
		E·l cor me ditz
		Que no·m sobreleu ni felnei,
		Mas que folei
	80	Savis e plassa·m ma foldatz;
		Qu’enans s’azina·l fols senatz
		De joi que·l savis consiros,
		Pos ses joi viure s’es triatz
		Pel peior entrels gais e·ls pros.
VII	85	E fora m’en plus tost tornatz,
		Si·l senher, cui serf Aragos,
		No me tengues, e si sui fatz
		Qu’er’en fol gasti mas chansos.
VIII		Mas per mo Sobre-Totz me platz,
	90	Que s’en demora per sazos.