Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,065 Auteur: Giraut de Bornelh Genre: Planh Numero: LXXVI

S'anc jorn agui joi ni solatz

I	1	S’anc jorn agui joi ni solatz,
		Er sui iratz
		E per totztems dezesperatz;
		Car m’aventura no·m retrai
	5	Ja cobre jai,
		C’ades me desfui e·m trasvai,
		Qu’era·m repaira·l consirers,
		Que·m fetz ja doler, d’ams ladrers.
II		Car entr’aspres cre que fui natz
	10	C’a Deu no platz
		Que nuls mos bos amics privatz
		Viva tan com l’altra gens fai;
		Aissi m’eschai
		Per mo Linhaure qu’enoi‚ n’ai,
	15	Pos Mos-Jois me falhi primers,
		En cui comenset l’encombrers.
III		Mas era·m alques conortatz
		Com om forsatz,
		Car vos, Linhaures, m’amavatz;
	20	Mas era·m desconortarai,
		Car no·us veirai
		Ni ja mais no·m venran de lai
		Salutz ni cortes messatgers,
		Don jois me sol venir enters.
IV	25	A! bels amics ben ensenhatz,
		Nescis als fatz
		E drechs e savis als membratz,
		Per vos tenh vil abril e mai
		E·l dolz tems gai
	30	Ni ja mais no m’alegrarai
		Ni no chantarai volonters,
		Mas no·us posc be planher esters!
V		A! tans bels sabers en portatz,
		C’un no·n laissatz!
	35	Ja mais vostre pars n’er trobatz?
		C’anc no vi ni ja no veirai,
		Tan non irai,
		D’un sol ome tan bel assai
		Ni no deu dire chavalers
	40	Que tans en agues olivers!
VI		Er’es morta bela foldatz
		E jocs de datz
		E dos e domneis oblidatz.
		Per vos se pert pretz e dechai;
	45	Trol port Velai
		Man pro esdevenran savai,
		Cui vos fotz guitz e companhers
		E melhs apres de bos mesters.
VII		Dels vostres trobars esmeratz,
	50	De las bontatz,
		Del pretz, del sen, de las rictatz
		En degran esdevenir jai
		Celh cui peitz vai.
		Ja dels vostres bes no·m gicrai
	55	Que·l bos maestres Berengers
		En ressembl’era lauzengers!
VIII		Ja dizon que per vos s’estrai
		Proensa de fachs galaubers,
		C’us lai no n’es tan fazenders!
IX	60	Mos Sobre-Totz, si·m fos acers,
		Lo cor se·m degra far carters!