Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Code: 330,005 Auteur: Peire Bremon Ricas Novas Genre: Canso Numero: VII

Be volgra de totz chantadors

I	1	Be volgra de totz chantadors
		fos tan sobriers majers mos sens,
		con am mielhs e [sui] pus temens
		de totz los autres amadors ;
	5	breu fera pus adomniva
		chanso, onran e tenen car
		vos, que m’es de rie pretz ses par,
		dona plazen senhoriva ;
		que far la degra mielhs de be,
	10	car aten tan auta merce.
II		E qui per dir sobre-lauzors
		de sa dona fon anc mentens,
		don las vos et [er] ver dizens,
		dona ; car vostra grans valors
	15	es tan per drech sobr’autiva,
		c’ab lieis no·s pot lauzors engar ;
		per que deu tot laus averar
		vostra valors esforsiva,
		c’ab sel creis l’autz pretz que·us mante ;
	20	per qu’ieu deziv de vos merce.
III		Aisso·m fai dir, dona, Amors
		e l’onratz pretz sobre-valens
		que·us fai grazir a totas gens ;
		per que una dossa legors
	25	es de mon ferm cor aiziva,
		totas vetz que n’auja parlar ;
		c’usquecx vos cuja mielhs lauzar,
		car vostre laus vers aviva
		lurs lauzors, car aisi·s cove ;
	30	per so no·us aus clamar merce.
IV		Tant es nobla vostra ricors,
		e·l vostre nou[s] cors covinen[s]
		e[s] tan bels, e l’esgart[z] plazens,
		e tan vera·l fina colors
	35	fresca, natural e viva ;
		e tant gent sabetz dir e far
		so que·us tanh et azaut onrar,
		c’a tot hom’es agradiva ;
		per qu’ieu non ai fin joi de re,
	40	mais d’atendre vostra merce.
V		Mot es ric[x] pretz, sens et honors,
		mezura e ensenhamens
		ab vos, dona ; e sui jauzens
		can dezir lo vostre secors,
	45	que mos ferms volers m’abriva ;
		mas ab tot so tem dezirar.
		Doncx be·us temeria prejar ?
		Co[m] ? — Car Amors m’o esquiva,
		tant que ja no·us dirai, so cre :
	50	« Bela dona, si·us plai, merce! »
VI		S’ieu vos auzes prejar de re,
		dona, be·us queregra merce.