Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,015 Auteur: Bertran d'Alamanon Genre: Sirventes Numero: V

Pueis chanson far no m'agensa

I	1	Pueis chanson far no m’agensa,
		Farai un nou seruentes
		Q’er de l’afar de Proensa,
		E trametrai·l als Frances ;
	5	Qe si fai lonia bestensa
		Cel qi es coms e marqes,
		Tart li rendran per temensa
		Sas rendas li Marseilhes,
		De ço qu’el prendia el port
	10	E de l’alre qe·il fan tort.
II		Lai li man en souinensa
		Q’el uenga en cest paës,
		Q’el pert d’Avignon sa renda,
		Si tot sos paires conqes,
	15	E d’Arlle, a ma paruensa,
		Tot so qe·l pros coms y pres,
		E de çai d’Aus, part Durensa,
		Lo comtat de Gabenses ;
		Mas si non fai long acort,
	20	Ia non perdra camps ni ort.
III		Mas ges en ço non entenda
		Le coms, qe per seiornar
		Ni per far lonia bestenda
		Puesca sai sos dreitz cobrar ;
	25	Anz lh’ er ops qe·l man estenda
		E pens de souen armar,
		E qe tueilha e don e prenda,
		S’onrada gerra uol far ;
		Q’aissi cobrara l’onor
	30	Qe zai pert a desonor.
IV		.  .  .  .  .  .  .  .  .  .  .  .
V		Tan mala ui s’acoindansa
		Qi·l mes çai en cest païs,
		Qe cel qi la moilheransa
		Feron, n’iran am caps clis ;
	45	Mas se·l fils del rei de Fransa
		Pert sai enfre sos vesis,
		Tart conqerra per semblansa
		Outramar Turcs ni Colmis,
		Qar qi mal demanda·l sieu,
	50	Grieu conqerra l’autrui fieu.
VI		S’en brieu non fai comensansa
		Le coms, ben sui certz e fis
		Qe tant l’autra partz s’enansa,
		Qar tan seiorn’ a Paris.
	55	Per qe pes’ en la balansa
		Mas le mals qes hom en dis,
		No fai le bes ni l’onransa,
		Se meil çai no s’afortis ;
		Mas tot o reuenra lieu,
	60	Sol li faig non syon grieu.