Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 189,005=076,014 Auteur: Granet , Bertran d'Alamanon Genre: Tenso Numero: XVII

Pos anc no·us ualc amors, senh'en Bertran

I	1	Pos anc no·us ualc amors, senh’en Bertran,
		Per c’amas leys, pus no·us ama ni·us senha ?
		Que pus no·us a ualgut, ia d’er’enan
		No·us cal auer respieg que iois vo·n uenha ;
	5	Que outra mar aug dir que Antecrist renha,
		C’ap los seus ue, que totz sels ausiran
		Que no·s uolran couertir prezican ;
		Per qu’ie ·us cosselh que de l’arma ·us souenha
		E partes uos de leys c’amar no·us denha.
II	10	Amicx Granet, ben m’anatz conortan,
		Qu’ie ·m tenc per ricx, sol c’ayso s’endevenha,
		Car Antecrist sai c’a de poder tan
		Que ben pot far, si·s uol, aur fin de lenha ;
		Doncx segur soy que ma dona·m destrenha,
	15	Si·l uuelh creyre ni far tot son coman ;
		E de may re non ay tan gran talan
		Mas que el fos passatz de say Sardenha,
		C’ab luy suy sertz que totz mos mals reuenha.
III		Doncx l’aures vos, senher, forsadamen,
	20	S’a leys desplatz et Antecrist la·us dona,
		E fares y uas amors falhimen,
		Et en amors forsa non es ges bona ;
		E sel que pert son plag, mal si razona,
		Et elh’ e uos perdres, las, eysamen,
	25	Si d’Antecrist crezes son mandamen ;
		Car comprares la soa plazen persona,
		Si en yfern vostr’arma s’enpreyona.
IV		Ren c’om fassa per son estorsemen
		De mort, tortz es per cert qui·l n’ochaizona ;
	30	Et yeu era·n uengut al fenimen
		Per leys que a de ualen pretz corona.
		Cal tortz er doncx si mos cors s’abandona
		Ad Antecrist, pos far me pot iauzen ?
		E si pequi ni pert del tot mon sen
	35	Per sa beutat, tan play qui la·m fayssona,
		Mal fara Dieus, s’aquest tort no·m perdona.
V		Senher, s’amatz la premieyra la·us dona,
		Ad Antecrist preguatz que·us don iouen,
		Car uos es uielhs et ilh uielha issamen ;
	40	E pos uilhenc abdos uos dessazona,
		No seria ses iouen l’amor bona.
VI		Amicx Granet, la premieyra·m razona ;
		Car me camiet, camiar l’ay eyssamen ;
		Pos en Sordel n’a ben camiadas cen,
	45	Ben puesc camiar una, si no m’es bona,
		Et amar leys c’a de fin pretz corona.