Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,007 Auteur: Daude de Pradas Genre: Canso Numero: IV

De lai on son tug miei desir

I	1	De lai on son tug miei desir,
		car sai que cill no·m desira,
		per q’ieu soven plaing e sospir ;
		mas ill non plaing ni sospira.
	5	Per so de lieis fort mi rancur,
		et es dreita ma rancura,
		q’ieu non pens d’autra ren ni cur,
		et ill de mi non a cura.
II		En mi son tuich aquil conssir
	10	don nuils fis amans cossira ;
		e si be·m vau ni·m volv ni·m vir,
		mos cors no·is volv ni no·is vira
		de lieis que aten que·m meillur,
		que tot so qe·is vol meillura,
	15	e sol c’aillors no se pejur
		Amors, ab lieis non pejura.
III		Totz los afans qe·m fai sofrir,
		mout voluntiers los sofrira,
		s’ela·m deignes sol acuillir
	20	tan gen cum ieu l’acuilira.
		Ja no·ill agra cor flac ni dur,
		Doncs per que m’es ill tant dura?
		Qe on plus ieu vas lieis m’atur,
		et ill meins vas mi s’atura.
IV	25	Si s’agrades de mon servir,
		de tot mon sen la servira,
		car d’aquest mal qe·m fai languir,
		sai ben que puois non languira ;
		mas ill non vol precs ni conjur,
	30	e si Merces non conjura
		tant c’un pauc vas me s’adreitur,
		non aura de mi dreitura.
V		Non puosc mudar c’ades non tir
		lai on mos mals aips me tira,
	35	car tot mon cor m’a faich partir
		de lai, don ja no·is partira,
		si·l sieu esgart dousset e pur,
		qe·m fan cuidar qu’il es pura,
		mi dissessen qe·m fes segur
	40	de leis que no m’asegura.