Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,009a Auteur: Daude de Pradas Genre: Canso Numero: X

El temps que·l rossignols s'esgau

I	1	El temps que·l rossignols s’esgau
		e fai sos vers sotz lo vert fuoill
		per sa pareilla, qan l’acuoill,
		no·m laiss’amors estar soau,
	5	anz vol qu’ieu chant, o yuoill’o no,
		cill que m’a tengut en preiso
		tant longamen c’apenas sai
		si poirai viure, si·m n’estrai,
		que mais non torn en son estatge.
II	10	Ab bel semblan et ab cor brau
		a tengut, cill cui amar suoill,
		aissi lonc temps mon cor en vuoill
		que l’uoill m’en son tornat tot blau.
		Totz hom qu’en amor s’abando
	15	en trop ric luoc, sap per razo
		cal angoiss’a, ni cal mal trai
		qui ama sa que no·ill eschai,
		si Merces noi forssa paratge.
III		De Joi Novel segiei l’esclau,
	20	tro fui vengutz a son capduoill,
		on mi mostret tant gran orguoill
		cum si tengues del mon la clau.
		Del covinen mi fetz tenso,
		cais que disses: « E no i a pro,
	25	s’ab pessamen cortes e gai
		vos sai donar joi et esmai
		e·us fatz plazer vostre dampnatge ? »
IV		En greu pantais viu et estau
		e res no m’aven de qant vuoill,
	30	ni garir d’aiso don mi duoill
		non puosc, s’a Bel Desir non vau
		querre capteing contra leo
		que·s fiza tant en sa faisso
		que so que·s vol fai e desfai,
	35	e trop l’ancse de pejor plai
		on plus li sui de franc coratge.
V		Ab tal agur intriei e nau
		lo jorn qe·m mostreron miei huoill
		una falsa ren, don mi duoill ;
	40	que d’amor muor e si m’en lau.
		Anz mais hom tan marritz no·n fo ;
		c’autras no m’ant ni mieus non so,
		e puois autre ni ieu no m’ai,
		ben pot saber, no m’aura mai
	45	cill que no volc mon homenatge.
VI		A mon amic, vas cui s’atrai
		Pretz et Valors en tot cant fai,
		chanssos, ten ton primier viatge.