Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,010 Auteur: Arnaut de Maruelh Genre: Canso Numero: XVII

Belh m'es quan lo vens m'alena

I	1	Belh m'es quan lo vens m'alena
		en abril ans qu'entre mais,
		e tota la nueg serena
		chanta·l rossinhols e·l jais ;
	5	quecx auzel en son lenguatge,
		per la frescor del mati,
		van menan joi d'agradatge,
		com quecx ab sa par s'aizi.
II		E pus tota res terrena
	10	s'alegra quan fuelha nais,
		no·m puesc mudar no·m sovena
		d'un amor per qu'ieu sui jais ;
		per natur' e per uzatge
		me ve qu'ieu vas joi m’acli,
	15	lai quan fai lo dous auratge
		que·m reve lo cor aissi.
III		Pus blanca es que Elena,
		belhazors que flors que nais,
		e de cortezia plena,
	20	blancas dens ab motz verais,
		ab cor franc ses vilanatge,
		color fresc' ab saura cri.
		Dieus, que·l det lo senhoratge,
		la sal, qu'anc gensor non vi !
IV	25	Merce fara, si no·m mena
		d'aisi enan per loncs plais,
		e don m'en un bais d'estrena
		e segon servizi·l mais !
		E pueis farem breu viatge
	30	sovendet e breu cami,
		que·l sieus belhs cors d'alegratge
		me a mes en est trahi.