Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,017 Auteur: Aimeric de Belenoi Genre: Canso Numero: VIII

Pos Dieus nos a restaurat

I	1	Pos Dieus nos a restaurat
		Lo pro comte proensal
		De ric lingnaze reial,
		Torn m'en en Proenza
	5	On comencet e comença
		Veilla valors e novella ;
		Que, cant mor, lai renovella,
		E cals quez aia nom de pro,
		De Proença l'a, per raso,
	10	Aissi con de Crist Cristias,
		Per que·l noms es vers e certas.
II		Per paor n·ai tant estat
		D'una douz' amor coral,
		Que m'aucizes, non per al ;
	15	E pos, tant m'agença
		(Si tot no·n aus far parvença),
		Que de lai tro en Castella
		Non trop neguna tam bella
		Que mi get de·l cor sa faicho.
	20	Mas, car lo miraill e·l cordo
		Donet, mo vezen, ab sas mas,
		M'ajosta entre·ls Catalas.
III		C'aissi a mon sen forchat
		Mon ric autiu cor leial,
	25	C'aiço tenc car, don no·m cal
		Per sobretemença.
		Mas, cant serai part Argença
		Lai on fin' amors m'apella,
		S'adonc tan ben si capdella
	30	Com ara, be·l tenrai per bo :
		Qu'eu mi sent — si Dieus mi perdo ! —
		Que lai m'es lo plus soteiras
		De tot joi d'amor sobeiras.
IV		Anc, despueis que m'ac mandat
	35	Que non la vis nuill jornal,
		Non aic mais d'ir' e de mal,
		Ni no·n trop guirença ;
		Per qu'eu m'en torn part Durença
		Morir, pos vas mi·s revella.
	40	Que·l cor m'art dejois l'aissela
		Cant son lai, ez ab lei non so ;
		E ja, per l'autrui faillizo,
		Non degra esser tant londas
		De joi, ni d'ira tant propdas.
V	45	Que si m'agues enviat
		Per nuill hom, o per vasal,
		Solamen un « Dieus vos sal »,
		De ma malsabença
		Agra salvat reverenza.
	50	Mas ço·m creis e m'atropella
		Tal ir' e·l cor, e·m sagella,
		Don non cug aver guarizo :
		Car, pos Merces pert sa razo
		En amor, non son seguras
	55	D'esser ja mais jauzenz ni sas.
VI		.... Proensal son tan pro
		Que·l menre n'a pro fag de·l bo ;
		Per qu'eu volgra qu'entre lurs mas
		Fossetz, tro fos cobratz Tolsas.