Li Gotti, Ettore. Jofre de Foixà. Vers e Regles de trobar. Modena: Società Tipografica Modenese, 1952.

Code: 304,001 Auteur: Monge de Foissan Genre: Canso Numero: I

Be m'a lonc temps menat a guiza d'aura

I	1	Be m'a lonc temps menat a guiza d'aura
		ma bon'amors, quo fai naus sobre vens;
		mas lo peril m'asuava e·m daura
		lo bos espers qu'ay en vos fermamens,
	5	en cuy amar es ferms totz mos talens:
		qu'aissi m'an pres de vos, qu'es blond'e saura,
		LAS GRANS BEUTATZ E·LS FIS ENSENHAMENS.
II		No m'agra ops que·m fos tan agradiva
		vostr'amistatz, dona de bos aibs flors,
	10	pus deviatz envas mi tan autiva
		de cor esser, e lunhar mi·l secors
		qu'ay atendut lonjamens: quar us plors
		m’en sors tan grieus que non cre guaire viva,
		SI·M DESTRENHETZ, DONA, VOS ET AMORS.
III	15	E ja de vos no·m do so qu'ieu dezire
		jamais Ihezus, si per als a murir
		tem, mas per so quar sai ses contradire
		que pos mortz fos no·us poyria servir.
		Pero si·l mal vos plazen ni·l martir,
	20	ni·l grieu afan de que yeu suy suffrire,
		BEN AYA·L MAL E L'AFAN E·L COSSIR.
IV		Qu'a mi non deu plazer mas so que·us playa,
		pus del tot suy vostres ab bona fe,
		sol no vulhatz que d'amar vos m'estraya,
	25	quar le poders non es ges mieus de re.
		Be suy conques, mas trop suy luenh de be,
		qu'en tal cossir m'an empench que m'esglaya
		IR'E PEZARS E DONA SES MERCE.
V		E vos, Amors, pus ab tan ferm coratge
	30	vos am e·us ser, per que·us truep tan nozen?
		Qu'ades m'ausizetz tolhen alegrage
		et ades mi revivetz joys renden,
		per qu'ieu trac piegz d'ome del tot moren.
		Doncx pus avetz en mi·l plen poderatge
	35	AMORS, MERCE! NO MUEYRA TAN SOVEN.
VI		Dona, per vos m'es Amors tan sobreira;
		e si m'auci, de vos mou l'ochaizos.
		Don volgra be que·us auzes esquerreira
		nomnar vas fe: mas en vos falhizos
	40	non dey pensar sia, pero de vos
		tenc er, que·m faitz mal, dona plazenteira,
		MON COR E MI E MAS BONAS CHANSOS.
VII		Vostres suy tan, don'agradiv'e pros,
		qu’on piegz mi faitz, ab amor pus enteyra
	45	HUMILIS E FRANCS E FIS SOPLEY VAS VOS.