Li Gotti, Ettore. Jofre de Foixà. Vers e Regles de trobar. Modena: Società Tipografica Modenese, 1952.

Code: 304,003 Auteur: Monge de Foissan Genre: Canso Numero: III

Be volria, quar seria razos

I	1	Be volria, quar seria razos,
		qu'en ric senhor non caubes leu-jutjars,
		quar leu falh hom en ben-dir e blasmars,
		quar totz semblans non es verays ni bos,
	5	per qu'om non deu jutjar per sol semblan,
		e·l ricx honratz fay hi major erransa,
		quar ricors notz et honors desenansa
		lay on mal-dir ni repenre loc an.
II		Per tal semblan suy yeu de falhizos
	10	repres, quar fas enamoratz chantars,
		quays que no·s tanh selhuy chans ni trobars
		cuy ten destreg vera religios.
		Mas ges layssar no me·n dey yeu per tan,
		qu'enquer no m'es tan nozens la semblansa,
	15	que no·m valha mais la bon'esperansa
		e·l fait e·l dig per que·m demor en chan.
III		Per so dres yeu tot ades mos sermos
		e·l cor vas lieys, cui anc non nasquet pars,
		tant sobreval sos ricx guazardonars
	20	e l'autz pretz cars, bos ses melloyrazos;
		quar qui sec so do veno·l be pus gran
		que mal, e pus honors que deshonransa:
		per folh jutjar pus la foldatz s'enansa,
		quar hom no·s deu iraysser a sson dan.
IV	25	De mon trobar ven aitan bes e pros
		que per mos ditz, on a ricx ensenhars,
		son mant home gardat de far pezars,
		e de plazers faire son deziros;
		e gays solatz ven soven de mon chan,
	30	e·n sap chauzir hom pros sa benestansa,
		et yeu n'esper tan rica benanansa
		qu'hom anc melhor non gazanhet chantan.
V		Denan midons dezir, de genollos,
		mas jonchas sus, esser cum fis sers cars,
	35	en remiran sos amoros esgars
		e l'honrat cors e las plazens faissos,
		e qu'enaissi l'estes tostemps denan,
		que·y auria mout gent pro et honransa;
		mas er, las! muer de doussa deziransa,
	40	quar assatz mor qui viu en lonc afan.
VI		Mas quar totz hom deu son cor angoyssos
		cubrir de fors ab jauzens semblans cars,
		es de baudor per so mos semblans mars,
		quar parvens tristz ren quascun enujos,
	45	e d'e[nu]i deu quecx anar si garan,
		qu'hom en ven leu de totz en dezamansa;
		e pus midons vey d'aital acordansa,
		crei merces er que m’amor no soan.
VII		Mos Sobregaugz, vos am ab tal talan
	50	qu'e mon voler non a mas benestansa;
		doncx, si·m datz joy, er vos cortez'onransa,
		qu'hom honra si los sieus azaut honran.