Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Code: 047,004 Auteur: Berenguier de Palazol Genre: Canso Numero: I

Bona dona, cuy ricx pretz fai valer

I	1	Bona dona, cuy ricx pretz fai valer
		Sobre las plus valens, al mieu vejaire,
		Avetz razo per que·m dejatz estraire
		Lo belh solatz ni l'amoros parer,
	5	Si non quar vos auziey anc far saber
		Qu'ie·us amava mil aitans mais que me ?
		En aquest tort me trobaretz jasse,
		Quar non es tortz que ja·us pogues desfaire.
II		Si·l belh semblant que·m soliatz aver
	10	De clar que fo, dona, tornatz en vaire,
		Quar connoissetz qu'ieu no m'en puesc estraire,
		Mielhs me fora ja no·us pogues vezer ;
		Quar ges pauzar no·us puesc a non chaler :
		Tals es l’envey' e·l dezir que m'en ve
	15	Manhtas sazos que de vos me sove
		E vir mos huelhs envas vostre repaire.
III		E si de vos dizetz que·m dezesper,
		Dona, no sai de qui·m sia esperaire ;
		Si m'avetz fait d'autras amar estraire
	20	Q'una non vey ab cui dezir jazer :
		Sens totz covens vuelh ab vos remaner,
		E sia en vos que·m fassatz mal o be ;
		Pero guaratz qual mielhs vos en cove,
		Que no·us deman oltra grat pauc ni guaire.
IV	25	De bon talan, ab cor leyal e ver
		M'autrey a vos per vostres comans faire,
		Sol no·m mandetz de vos amar estraire,
		Quar ja, dona, no·n auria lezer ;
		E no m'en cal per messongier tener,
	30	Aissi m'en pren, dona, per bona fe ;
		Ja dezamar no·us poiria per re,
		Ni fi non vuelh, s'aman no la·n puesc traire.
V		Trop mi podetz lonjamen mal voler,
		Si·m dezamatz quar hieu vos suy amaire,
	35	E volgues m'en mon essien estraire,
		Ja de mon cor no n'auria poder ;
		E doncs, dona, pus no m'en puesc mover,
		Ni m'abelhis autre joys ni·m soste,
		S'ab vos no truep chauzimen e merce,
	40	Vostre belh cors n'er vas Amor peccaire.
VI		Amors n'a tort quar enveyos me te
		Del vostre cors graile, gras, blanc e le,
		S'inquer no·m faitz mielhs que no·m soletz faire.