Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 281,010 Auteur: Lamberti di Buvalel Genre: Sirventes Numero: IX

Toz m'era de chantar geqiz

I	1	Toz m'era de chantar geqiz,
		Tro q'uei vei q'es l'ivernz passatz
		E vei per vergers e per praz
		Las flors e l'erba reverdir
	5	E·ls auzels cridar e braidir,
		Per qe·m sui un pauc alegraz,
		E pois que a mon fin cor plaz
		Q'eu chant, metrai me·n en essai
		De zo, don el s'es abeliz,
	10	Que bon chantar fara oimai.
II		Mas tant sui pensius e marriz,
		Qe no sai que·m dic ni qe·m faz.
		Demandaz cum? Voill o sapchaz,
		Pos vos tant o volez auzir:
	15	Er es ben greus fais a soffrir
		Dels rics crois manenz renegaz
		Q'eu vei en l'auzor grat poiatz
		O·ill paubre d'aver fin verai
		Degrant estar. — Fol, tu qe diz?
	20	— Per cui aven, e·us o dirai.
III		Dire me·l farez a enviz,
		Mas non puosc al, tant sui iratz;
		Que cellas, per cui es baissaz
		Prez e qui fan ioven morir
	25	E fan amor e ioi faillir,
		An mes en soan los presatz,
		Et acoillon cels cui lor plaz,
		E·ill vallen son de nïen gai,
		Que quant n'an los gratz mal soffriz...
	30	Non voill al dir, mas mal estai.
IV		Ha, dompnas, con es prez deliz
		E iois e deduich e solaz,
		Cum no faiz ço que far degraz!
		E pograz lo segl'enantir,
	35	Amar, honrar et acoillir
		Cels en cui son finas bontaz,
		Per qe represas no fossaz;
		E cachar cels de cui se fai;
		Que ben taing qe cels si'auniz
	40	Ves cui nuilla bontaz no·s trahi.
V		Et aissi fora·l monz gariz
		E·l vostre prez ders et auchaz,
		Que per vostras finas beltaz
		Pograz tot lo mont enriquir.
	45	Ab cavalcar et ab garnir,
		Mainz rics torneis viram mesclaz,
		E·l iois d'amor for'essauchaz.
		Ço feran li valen, zo sai,
		E·l vostre prez fora·n auziz
	50	E loing e pres e chai e lai.
VI		Mos chanz, vai tost e eserniz
		E fai·t audir enves toz laz,
		Qeç en tal loc seras cantaz
		O·m faras amar e grazir,
	55	Et en tal, per ver o pois dir,
		On serai maldiz e blasmaz,
		Et er t'aitals astres donaz
		De qe·m plaz fort q'aissi te·n vai;
		Que pels pros seras acoilliz
	60	E volran te mal li savai.
VII		Aquest novel chant me portaz,
		N'Elias, lai non es beltaz
		Ab ioi et ab fin prez varai,
		Enves Est a Na Beatriz,
	65	A Mon Restaur, lai on estai.