Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 016a,002 Auteur: Albric Genre: Canso Numero: XIX

Na Maria, pretç e fina valors

I	1	Na Maria, pretç e fina valors
		E·l giois e·l sens e la fina beutatç
		E l'acuglirs e·l pretç et las onors
		E·l gintç parlars e l'avinens solas
	5	E la doç cara e la gaia acundança
		E·l ducç esgartç e l’amoros se[m]blan
		Ce son e vos, don non avetç egansa,
		Me fan traire vas vos, sis cor truan.
II		Por ço vos prec, si·us platç, ce fin'amors
	10	E gausimentç et doutç'umilitatç
		Me puosca far ab vos tan de socors
		Ce mi donetç, bella dopna, si·us platç,
		So don plus ai d'aver gioi esperansa,
		Car en vos ai mon cor e mon talan
	15	E per vos ai tut so c'ai d'alegransa
		E per vos vauc mantas ves sospiran.
III		E car beutas e valors vos enansa
		Sobra tutas, c'una no·us es denan,
		Vos prec, se·us plas, per so ce·us es onransa
	20	Ce non ametç entendidor truan.
IV		Bella dompna, cui pretç e giois enança
		E gientç parlars, a vos mas coblas man,
		Car e vos es gaessa et alegransa
		E tutç lo bens c'om e dona deman.