Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,003 Auteur: Lanfranc Cigala Genre: Canso Numero: XXXIV

E mon fin cor regnia tan fin'amors

I	1	E mon fin cor regnia tan fin'amors
		Qu'eu chantarai, si tot s'espan freidura,
		Que no·m devon agradar autras flors
		Ni chanz d'auzels ni folha ni verdura
	5	Mais ioi d'amor; doncs d'amor, qi·m ten gai,
		Farai chanson que bona razon n'ai,
		E qi·s voilha fassa chanson o dansa
		De chanz d'auzels, qar eu no n'ai voler
		De far chanson mas d'amoros plazer,
	10	Que ses amor no fon anc benanansa.
II		E si solatz es faiditz pels maiors
		Ni leialtatz non reignha ni drechura,
		Anz tenon cort cobeitatz et errors
		Per lo conseil d'orgoil ab desmesura,
	15	Ges per aiso de chan no·m laissarai
		Qe·l dan, qu'es granz, acreisser non s'eschai;
		E s'il fan mal, il n'aian la pezansa,
		Qu'ieu non mier mal ni no·i vueil part tener,
		Anz vueil chantar d'amor e ioi aver,
	20	De qu'ieu mi lau e del mais ai fiansa.
III		E·m meravil de totz los clamadors
		Qe·s van claman d'amor ni·n fan rancura,
		Car entre totz los corals amadors
		Non fo anc us miels ames ses falsura
	25	Con ai amat et am et amarai;
		Es ad amic adoncs amors esglai,
		Sentit n'agr'eu em fag o en semblansa,
		Tant loniamen m'a tengut en poder;
		Mas anc [nulh] iorn no·m fes amors doler,
	30	Anz m'a totz temps fag viure en alegransa.