Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,002 Auteur: Lanfranc Cigala Genre: Chanson religieuse Numero: XXXVIII

En chantar d'aquest segle fals

I	1	En chantar d'aquest segle fals
		Ai tant'obra perduda,
		Dont tem aver penas mortals,
		Si merces no m'aiuda,
	5	Per que mos chans si muda,
		E·l vueill offrir
		Lai don venir
		Mi pot complid'aiuda,
		Sol no·m si' irascuda
	10	La Maire Dieu,
		Cui mos chantars saluda.
II		Pero, si garda mos pechatz,
		Ben deu esser irada;
		Mas sa grant merce prec, si·l platz,
	15	La mi fass'apagada.
		Aitals merces m'agrada,
		Quar es secors
		Dels peccadors,
		Cui es razos loniada.
	20	Sia·m merces donada,
		Maire de Dieu,
		Quar per merce fust nada.
III		Qu'anz que·l vostre bels cors ioios
		Nasques, era establida
	25	Morz a chascun qu'el segle fos,
		Quar l’avia merida
		Eva, tant fon ardida,
		Quar tenc a leu
		Lo dig de Deu,
	30	De que fon pois aunida;
		Mas pois venc vostra guida,
		Maire de Dieu,
		Em trag de mort a vida.
IV		Per Eva e per son pecchat
	35	Era tota genz morta;
		Mas per vostra virginitat
		N'es uberta la porta.
		Eva per via torta
		Nos aduis mort,
	40	E vos conort,
		Don la gens es estorta.
		Tal frug vostr'albres porta,
		Maire de Dieu,
		Que vida nos aporta.
V	45	Ev'autreiet, quar li fon bel,
		Al diable bauzia,
		E vos a l’angel Gabriel
		La vera profecia.
		Eva ac nom l'enemia;
	50	El contradig,
		Segon l’escrig,
		Ditz hom: «Ave» Maria.
		Tot so qu'Eva desvia,
		Maire de Dieu,
	55	«Ave» torn'en la via.
VI		Per qu'ieu vos lau e·us dei lauzar,
		Gloriosa Reina,
		Que chascunz nafratz pot trobar
		En vos vera mezina,
	60	Quar vostra merces fina
		Chascun que·s vol
		Guaris de dol.
		De mal e de ruina,
		Si de cor vos aclina,
	65	Maire de dieu,
		Qu'als bos precx es vezina.
VII		Ara vos prec e·us clam merce
		Que no·m siatz loindana,
		Qu'ieu sent nafrat mon cor e me
	70	E ma voluntat vana
		De folli' e d'ufana.
		Per qu'ieu vos quier
		Cosseil entier
		Et aiuda certana.
	75	Sia·m merces prosmana,
		Maire de Dieu,
		Don m’arma sia sana.
VIII		Quar si tot ai d'obra faillit,
		Crezens'ai dreit'asiza:
	80	Paire, Fill e Saint Esperit
		Crei un Dieu, ses diviza;
		La charn, qu'en crotz fon miza,
		Pres Dieus de vos
		Per salvar nos,
	85	E per so fon auciza;
		E qui cre d'autra guiza,
		Maire de dieu,
		Sai ben que·l col se briza.
IX		E crei que fos enant lo part
	90	Et apres ses faillenza
		Vergena, ques anc no y ac part
		Hom ni carnals semenza:
		E·l ver salm que comenza:
		«Credo» crei tot
	95	De mot en mot.
		D'alre·m faitz doncs valenza.
		Quar de falsa crezenza,
		Maire de Dieu,
		No m’a ops penedenza.
X	100	Pero, Domna, quar miels sabes
		So que·m fai sofraichura,
		De so qu'obs m'es mi secorrez
		Tant quant vida mi dura,
		Qu'eu faz'obra tant pura,
	105	Que paradis
		Aia conquis,
		Cant er la noigz escura.
		Be sai que·m noz drechura,
		Maire de dieu,
	110	Mais merces m'asegura.