Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,004 Auteur: Lanfranc Cigala Genre: Tenson fictive Numero: XL

Entre mon cor e me e mon saber

I	1	Entre mon cor e me e mon saber
		Si moc tenzos, l'autra nueig qe·m dormia,
		Del faillimen don si plaignon l'aman,
		Qu'eu dizia q'en lur colp' esdeve,
	5	E mos cors diz: — Segnor, ges eu no·l cre,
		Anz es amors cel qui fai tot l'engan. —
		E·l senz carget las domnas de faillia,
		Et enaissi tenzonem tro al dia.
II		Mos cors levet e dis: — E·us voil qerer,
	10	Segnor, si·us platz, perdon q'eu primers dia.
		Se cel qi fail agues lo dol e·l dan,
		Tot l'agr' amors, c'aitan mal si capte,
		Q'el destreing l'un e laiss'a l'autre·l fre
		E l'un te sors, l'autre carga d'afan,
	15	E fui als pros e·il fals n'an manentia;
		Ara iutiatz si res piegtz far poiria. —
III		— Et eu, seignor, en dirai mo voler,
		— Zo dis mos senz, — q'eu crei qe·il failla sia
		De las domnas, car si fan pregar tan.
	20	Es es tals us qe can la domna ve
		Qui ben la prec, ia mais no·il volra be,
		Pois prega tal qu'ela non vi pregan;
		Mas eu tengra plus bella cortezia
		Si de cellui qi l'ames fos amia. —
IV	25	— Senz, vos e·l cor failletz, al mieu parer,
		Qe·l faillimenz mou totz de leuiaria
		Dels amadors, qi son fals e chamian,
		E car domnas i trobon pauc de fe
		Si fan preiar e loingnon lur merce
	30	Per conoisser lo leial del truan;
		E quan trobon amic senz tricharia
		Li fan amor, si com a faig la mia. —
V		Ab tan mi fon venguda per vezer,
		So·m fon semblan, madomna qe·m dizia:
	35	— Bels douz amics, eu vos ren merce gran
		De la honor q'aves facha per me
		A las donas, e non failletz de re.
		Si·l drut fosson tal can vos, ia blasman
		Non s'anera negus de drudaria,
	40	Mas savis iau qe fols beu sa follia. —
VI		— Domna, merces qar m'aves onrat tan,
		Vostre sui eu e serai a ma via,
		E·m lau de vos, qi que·s plaingnia d'amia.