Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,007 Auteur: Lanfranc Cigala Genre: Planh Numero: XLI

Eu non chant ges per talan de chantar

I	1	Eu non chant ges per talan de chantar;
		Mas si chant eu, non chant, mas chantan plor,
		Per c’aital chan deu hom clamar chan-plor
		Car es mesclatz lo chanz ab lo plorar;
	5	E non dig'om q'ieu aia fait faillenza
		D'aital mesclar, car zo qu'eu dic ploran
		Non poiri'om suffrir d'auzir ses chan,
		Tant es mortals la perd'e·ill meschaenza.
II		Car morta es cella qu'era ses par
	10	De pretz prezat e de valen valor,
		De cortes ditz e de faitz e d'onor,
		D'eseingnamen, d'acuillir e d'onrar,
		Na Berlenda, domna de conoissenza,
		Per cui devon plorar li pauc e·il gran,
	15	Car il era de tot fait benestan
		Cim'e raditz, flors e frutz e semenza.
III		Mort es tot zo qu'el mon era de car,
		E zo per qe valion li meillor,
		E zo per qe chantavon chantador,
	20	E zo per que prezavon domneiar,
		E zo per que valia neis valenza
		E zo per qe estava autr'enan:
		Plor doncs cascus qe passai son mil an
		Que mortz no fes tan gran desconoissenza.
IV	25	Om non la vi ni non l'auzi nomnar
		Qe non la fes sa domn'e son segnor,
		Car fazia ab gaug et ab douzor
		Los crois valer e·ls valenz afinar.
		E doncs per que no mor tota·il proenza
	30	Ont il mori e tuit cil qe·i istan?
		C’oi mais en dol et en consir viuran,
		E zo li er piegz de mort, a ma parvenza.
V		Pero sivals hom non la pot comtar
		[Mal a] son ops, mas a nostra dolor,
	35	Car uns comtatz non l'era pron d'onor,
		Per qe lla vol Dieus en cel far regnar;
		E si tot sai en reman dechaenza,
		Li saint angel la·n portaran chantan;
		Per son profeg, si tot nos torn'a dan,
	40	No·s deu adur de plorar estenenza.
VI		Luresana, pensatz de penedenza,
		Que Dieus vos vol confondre derenan,
		E pareis ben al sobremortal dan
		C’aves äut, que vostra mortz comenza.