Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,006 Auteur: Lanfranc Cigala Genre: Sirventes Numero: XLIV

Estier mon grat mi fan dir vilanatge

I	1	Estier mon grat mi fan dir vilanatge
		Li faillimen vironat de follia
		D'un flac Marques, e sai qu'eu faz follatge
		C’ab escien faill per autrui faillia;
	5	Mas una res m'escusa, so enten,
		Qe se fossen cellat li faillimen,
		Ia de faillir non agr'om espaven,
		E qi fa mal ben pot soffrir c'om dia.
II		Per q'ieu dirai d'un fol nega-barnatge
	10	Sotera-pretz e destrui-cortezia,
		Qu'om ditz q'es natz de Monferrat linatge,
		Mas non pareis a l'obra q'aisi sia;
		Anz crei q'el fon fils o fraire de ven,
		Tan cambia leu son cor e son talen.
	15	En Bonifais es clamatz falsamen,
		Car anc bon faig non fes far a sa via.
III		Son sagramen sai eu qu'el mis en gatge
		Als Milanes et a lur compaignia,
		E·n pres deniers per aunir son paratge
	20	E vendet lur la fe q'el non avia;
		Pero de fe d'eretge no·l repren,
		Q'el iura leu e fail son sagramen;
		E s'el a n'Atz volgues rendre l'argen,
		Del sagramen crei q'om lo quitaria.
IV	25	Tant es avols e de menut coratge
		Q'anc iorn no·l plac prez de cavalaria,
		Per q'a perdut pro de son heritatge,
		Q'anc non reqeis per ardiment un dia;
		Mas qar a fag dos traimenz tan gen,
	30	A son seingnor antan primierainen,
		Pois a Milan, a cui frais convinen,
		El cui'a obs cobrar sa manentia.
V		Se·il fos segner, ia no·m feir' homenatge
		Adrechamen, car sai qe·l no·m tenria,
	35	Ni·m baisera mais de boch' el visatge,
		Car autra vetz la·m baiset a Pavia,
		Pois en baiset lo papa eissamen;
		Donc pois aisi tota sa fe desmen,
		S’ab me ia mais fezes plai ni coven.
	40	Si no·m baises el cul, ren no·l creiria.
VI		Ai, Monferrat, plagnes lo flac dolen,
		Qar aunis vos e tota vostra gen,
		C’aissi fenis l'onratz pres veramen,
		Qe Monferratz per tot lo mon avia.
VII	45	Haunit Marqes, al diabol vos ren,
		Q'a tal vasal taing aitals segnoria.