Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,018 Auteur: Lanfranc Cigala Genre: Chanson religieuse Numero: XLVI

Pensius de cor e marritz

I	1	Pensius de cor e marritz
		Cobleiare, car mi platz,
		E non voil esser blasmatz
		Si mos chanz non es grazitz
	5	Tant qom s'ieu era alegranz,
		C’anc iocs ni solatz ni chanz
		Ses alegrer non agron lur saizon,
		Mas chantar voill, vailla mos chanz o non.
II		Pero s'ieu tot sui marritz,
	10	Qan eu sui pro apensatz
		Meravillas vei assatz,
		Mas d'una·m sui esbaitz,
		Don sui trop meravillanz
		Car passa totas las granz,
	15	Coissi pot far mesfag ni faillizon
		Hom qui de mort non cuid'aver perdon.
III		Mas chascus, don sui marritz,
		Stai de mort asseguratz,
		E sap que non er mudatz
	20	Que chascuns er sepellitz.
		Mas qui non laissa·ls enianz
		Sembla qe·n sia doptanz,
		Car qui tailla de sa mort lo baston
		Non cre morir o sabers no·ill ten pron.
IV	25	Mas de mi sui plus marritz,
		Meravillos et iratz,
		Car zo q'eu plus repren fatz
		Vas Dieu qui mortz e traïtz
		Fon per nos gardar dels danz
	30	E dels efernals afanz;
		Mas s'ai faillit, eu li prec que·m perdon
		E farai li chantan confession.
V		Q'eu ai faig, don sui marritz,
		Los set criminals peccatz,
	35	De que m'enoi'e·m desplatz,
		E dels faillimenz petitz
		Tanz q'ieu no·n sui remembranz;
		Per q'ie·us acli sopleianz,
		Dieus, qui en crotz perdonest a un lairon,
	40	Qe·m perdonetz e no·i gardetz razon.
VI		Pero non sui tant marritz
		Q'eu sia desesperatz,
		Quar ai vist dels plus nafratz
		Per vostra merce gueritz;
	45	Per qu'e·us reqier merceianz,
		Qar dreitz voi mos dezenanz;
		E doncs merces m'aiut, q'ieu la somon,
		E dreg soan qu'a mon ops no·l teing bon.
VII		Maire de Dieu, totz mos anz
	50	Mi faitz far vostres comanz,
		Q'aissi serai certz de salvation,
		Per q'ie·us en prec con cel que vostr'om son.