Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,022 Auteur: Lanfranc Cigala Genre: Sirventes Numero: XLVII

Segnie'n Thomas, tan mi plai

I	1	Segnie'n Thomas, tan mi plai
		Lo pretz c'om de vos retrai,
		E·il honrat fag qe vos faitz lai
		Vos mi fan tan plazer de zai,
	5	Qe tot zo q'ieu puesc ni q'ieu sai
		Vos profer et ancara mai,
		Qe pauc mi sembla zo qu'eu ai
		Ad honrar vos si com s'eschai,
		Per qu'eu d'aillors m'en propcerai.
II	10	E temeria faillir,
		S'ieu m'enardis de querir
		Qe·m voillatz per amic tenir;
		Mas car de tot mon cor dezir
		Vostres precs per comanz auzir
	15	E vos honrar e obezir,
		Aisso me·n fai tot enardir
		Q'om pot ben demandar e dir
		Lai on hom a·l cor de servir.
III		E certanament vos dic
	20	Qe ia no·m trobaretz tric
		Ni fals ni felon ni enic,
		Anz mi trobaretz de cor ric,
		Qui qe l'aia croi ni mendic,
		Et auria·m per enemic
	25	Qui·us fezes enoi ni destric,
		Ni·m creiria d'aisso chastic,
		Q'aissi deu hom amar amic.
IV		E pos sui asseguratz
		A demandar zo qe·m platz,
	30	Prec que cobleian respondatz
		Ad aquestas coblas qu'eu fatz
		Per fermar nostras amistatz;
		Mas eu non qier ges qe·m digatz
		Si·us es gais ni enamoratz
	35	Q'aisso sai eu ben q'es vertatz;
		Qu'estiers non foratz tan prezatz.
V		Pero, si·us ven a plazer,
		Del vostre noble saber
		Voil per vos auzir e saber,
	40	Qar molt en poirai mais valer,
		Mas trop plus voluntiers vezer
		Vos volgr'ieu, zo sapchatz en ver,
		Mas quecs deu laissar remaner
		Zo qe vol, cant no·l pot aver,
	45	Tro qe n'ai'autra vetz lezer.
VI		En Thomas, cel qui·us fai valer
		Vos don complir vostre plazer
		E a mi don sen e poder
		D'onrar vos qe·i ai lo voler.