Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 436,001=282,001 Auteur: Simon Doria , Lanfranc Cigala Genre: Tenso Numero: LVII

Car es tant conoissenz vos voil

I	1	Car es tant conoissenz vos voil,
		Segne'n Lafranc, qerer d'amor,
		Q'ie·n voil appenr'et ai paor
		Non trassaillis als prims essais.
	5	Qal prezatz mais?
		O valen domna conqerer
		Per gran saber,
		O qe proeza vos enanz
		Tant qe de leis sias ioios?
II	10	Simon, non sui tals con ieu soil,
		Quar ieu cuiei ia per error
		Qe sabers guides l'amador,
		Mais ar d'aqel cuiar mi lais,
		Qar amor pais
	15	Iois on granz senz non pot caber;
		C’ab franc voler
		D'ardit cor vai amors enanz,
		E granz senz l'es contrarios.
III		De vostre conseil mi destoil,
	20	Segne'n Lafranc, ia mais no·i cor;
		Qar vos laissatz sen per follor
		E de folli'ardimenz nais
		Ab granz eslais;
		Donc pos follatges n'a·l poder,
	25	Grieu pot valer
		Nuls hom ni far bels faigz prezanz,
		Si no·l guida senz o razos.
IV		Folia no·m platz ni l'acoil,
		Ia no·m dones aital color;
	30	Mas granz senz no m'a tal sabor
		En amar, car mais i val iais;
		Ni non retrais
		Qe·m vengues foudatz a plazer;
		Anz dic per ver
	35	Tot zo non es ges foudatz granz,
		Qi non es senz als amoros.
V		Segne'n Lafranc, d'amor mi doil
		E n'ai pensamen e dolor
		E non puesc venzer per ricor
	40	Ni per ardimen tant gran fais;
		Anz creis l'esmais
		Qi·m fa qada dia doler
		E·m desesper,
		Per qe se·l senz no m'es garanz
	45	Qi·m guide, morrai ad estros.
VI		Amors vol qe cors d'amic broil
		De ioi de pretz e de valor
		E de bel solatz chascun ior,
		E granz sens l'es dols e pantais
	50	E se·n irais;
		Donc si·us deu senz d'amor valer,
		Al mieu parer,
		Partretz vos en per sos comanz,
		Per q'es granz senz meinz saboros.
VII	55	Na Flors-de-lis pretz e saber
		Ten en poder;
		Iutge, si·l platz, deserenanz
		E Iacme Grils q'es gais e pros.
VIII		Symon, ab mi si deu tener,
	60	Al mieu parer,
		Na Flors, e s'il n'es accordanz,
		No·m chal s'en Iacmes ten ab vos.