Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 252,001=133,007 Auteur: Elias Cairel , Isabella Genre: Tenso Numero: LXXII

N'Elyas Cairel, de l'amor

I	1	N'Elyas Cairel, de l'amor
		Q'ieu e vos soliam aver
		Voil, si·us platz, qem digatz lo ver,
		Per qe l'avez cambiad'aillor;
	5	Qe vostre chanz non vai si com solia,
		Et anc vas vos no·m sui salvatz un dia
		Ni vos d'amor no·m demandetz anc tan
		Q'ieu non fezes tot al vostre coman.
II		[Ma donn'Ysabella, valor
	10	Ioi e pretz e sen e saber
		Soliatz qec iorn mantener,
		E s'ieu en dizia lauzor
		E mon chantar, no·i dis per drudaria
		Mas per honor e pron q'ieu n'atendia
	15	Si con ioglars fai de domna prezan;
		Mas chascun iorn m'es anada cambian!]
III		N'Elyas Cairel, amador
		No vi mais de vostre voler
		Qi cambges domna per aver;
	20	E s'ieu en disses desonor,
		Eu n'ai dig tant de be q'om no·l creiria;
		Mas ben podetz doblar vostra follia.
		De mi vos dic q'ades vauc meilluran.
		Mas en dreg vos non ai cor ni talan.
IV	25	[Domn', eu faria gran follor
		S'istes gair'en vostre poder,
		E ges per tan no·m desesper
		S'anc tot non hai pron ni honor.
		Vos remanres tals com la genz vos cria,
	30	Et ieu irei vezer ma bell'amia
		E·l sieu gen cors graile e ben estan
		Qe no m'a cor mensonger ni truan].
V		N'Elyas Cairel, fegnedor
		Resemblatz, segon mon parer,
	35	Con hom qi·s feing de dol aver
		De zo dont el no sent dolor.
		Si·m creziatz, bon conseil vos daria
		Qe tornassetz estar en la badia
		E no·us auzei anc mais dir mon semblan,
	40	Mas pregat n'ei lo patrïarch'Ivan.
VI		[Domn'Ysabel', en refeitor
		Non estei anc matin ni ser,
		Mas vos n'auretz oi mais lezer
		Q'em breu temps perdretz la color.
	45	Estier mon grat, ni faitz dir vilania,
		Et ai mentit, q'eu non crei q'el mond sia
		Domna tan pros ni ab beutat tan gran
		Com vos avetz, per q'ieu hai agut dan].
VII		Si·us plazia, n'Elyas, ieu volria
	50	Qe·m disesses qals es la vostr'amia,
		E digatz lo·m e no·i anetz doptan,
		Q'e·us valrai s'ela val ni a sen tan.
VIII		[Domna, vos m'enqeretz de grant follia,
		Qe per razon s'amistat en perdria,
	55	E per paor qe lauzengier mi fan,
		Pero non aus descobrir mon talan].