Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 441,001=051,001 Auteur: Tomas , Bernado Genre: Tenso Numero: LXXIII

Bernado, la ienser dona que·s myr

I	1	Bernado, la ienser dona que·s myr
		En tot lo mon ni anc fos ni er mays
		Dieus prec que·m gart de mal e de falhir
		E·m do s'amor e·m tragua d'est pantays
	5	E dels peccatz, c'ai faytz mortals e lays,
		Me do, si·l play, de tot be far ayzina;
		Car dels peccatz ben es hora que·m lays
		E prec ne luy, a cui lo mon s'aclina.
II		Senher, si per iutgar ni per mentir
	10	Pot hom esser vas Dieu fis ni verays,
		Ni pel segle enganar ni trahir
		Ni per iazer de mans putas savays,
		Seretz, Senher, vos sals per tos tems mays
		Qu'us no·us estors parenta ni cozina
	15	Que no·n acsetz [anz] lo iazer o·l bays,
		Per que es fals, si com yeu vei maitina.
III		Mor de trueya, Dieu prec que te azir
		Car aysi·m vas de totz iorns a biays,
		E ia per mi non auras que vestir
	20	Ans anaras a guiza de bastays
		Per tal que tug se·n tragan lur estays,
		E ieu dar t'ay cent [colps] sobre l'esquina
		E no·t pesses de bo morcel t'engrays
		Ni qe·l te don si non os o espina.
IV	25	Senher Tomas, be mal sabetz partir,
		Car anc per vos non ompli be lo cays;
		Enans vos vey a totz iorns ir ab rir
		Et es vers so qu'En Borrel men retrays:
		Senher, si anc fossetz cuendes ni iays,
	30	Ar es uzatz ab ley que vos aclina....
		No diray pus: per ma dona me·n lays,
		A cui es greu car ab vos m'ai taïna.
V		Tart puiaras, mor de truey', a corina
		Ni a valor, ans cug tot iorn t'abays
	35	E say o ben el cor que m'o devina.
VI		Senher Thomas, vostra valor[s] no·ys fina
		Si com dizetz, qu'ieu dic, per San Girvays,
		C’anc per oste non crec vostra topina.
VII		Mor de trueya, votz as de sarazina;
	40	Dir potz que·t vols, car ieu no·m tenc a fays
		Lo fol parlar de ta lengua mesquina.
VIII		Pan d'ordy vielh e vi mudat de tina
		Bevetz, Senher, e maniatz ogan mays
		Et estaytz caut al foc en la cozina.