Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 461,107 Auteur: Anonyme Genre: Planh Numero: LXXV

En chantan m'aven a retraire

I	1	En chantan m'aven a retraire
		Ma gran ira et ma greu dolor.
		Non chan ges con autre chantaire
		Que chanta de ioi e d'amor;
	5	S'eu chan de boca, de cor plor,
		C’a chantar m'es razos contraire;
		Per que mos chanz a nom chan-plor,
		Que chanz no·m pot de plor estraire.
II		Ben deu cel plorar e dol faire
	10	Que pert amic ni bon segnor;
		Ni ja hom tro que n'es perdaire
		Non saura d'amic sa valor.
		La morz m'a fait conossedor
		De mon damnage non a gaire;
	15	Tuit cil c'amon prez ni valor
		Devon doler d'aquest afaire.
III		Morz nos a tolt lo debonaire
		Lo pro patriarcha Gregor,
		On avian fait lo[r] repaire
	20	Tuit li bon aib e li mellor.
		Qui veira mais tal guidador
		Tan pro, tan franc, tan larc donaire?
		Passat avia de largor
		Alixandre que venquet Daire.
IV	25	De lui fes valors essemplaire
		E lialtaz Castel e tor.
		Als bos fo francs e merceiaire,
		Plen d'umiltat e d'alegor.
		Los crois teni' en tal rancor,
	30	Per re non li podion plaire.
		Aras sabran gran e menor
		Que pert lo filz can mor lo paire.
V		Assaz podon cridar e braire
		Friolan e·l veizin d’entor,
	35	Car be savon lor aversaire
		Qu'il an perdut lo bon pastor,
		Qui los deffendia d'error
		E·ls crois fazia arreras traire.
		Lairon, predon e raubador
	40	An joi, car manz en fes desfaire.
VI		Dieus non fes rei ni enperaire
		Dels crois tal justiziador,
		Tal guerrier ni tal deffendaire
		Dels sieus ni ab tan de vigor,
	45	Que lai on jazia en langor,
		Que greu si podia sostraire,
		N'avion li croi tal paor,
		Que non ausavon vezer l'aire.
VII		Laissus en son sant luminaire,
	50	O son martir e confessor,
		Meta s'arma lo ver Salvaire
		E la deffende de tristor;
		Car s'anc nulz om per gentill cor,
		Per lialtat ni per maltraire
	55	Deu intrar el palais auchor,
		Gregors de Montlonc en es fraire.
VIII		Mon chan-plor tramet a la Maire
		De Jesu Crist lo Salvador
		E quier li com umil pecaire
	60	Que prec son filz per sa dolzor,
		Qu'en la celestial baudor,
		On son li patriarche maire,
		Meta l’arma d'aquest ab lor;
		Toz om en deu esser pregaire.
IX	65	A l’archediaque te·n cor,
		Chan-plors, que te sia gardaire:
		Car a del lignage la flor,
		Be deu al bon onde retraire.