Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 461,234 Auteur: Anonyme Genre: Planh Numero: LXXVI

Totas honors e tuig faig benestan

I	1	Totas honors e tuig faig benestan
		Foron gastat e delit e malmes
		Lo ior[n] qe mortz aucis lo miel[z] presan
		E·l plus plasen q'anc mais nasques de maire,
	5	Lo valen rei Manfrei, que capdelaire
		Fon de valor, de gaug, de totz los bes.
		Non sai cossi mortz aucir lo pogues.
		Ai, mortz crudels, cum lo volguist aucir,
		Quar en sa mort ve hom totz bes morir?
II	10	Qu'era se·n vai Honors sola ploran
		Que non es hom qu'ab se l'apel, ni res,
		Coms, ni Marques, ni Reis qe·s fass'enan
		Ni la semo que venga a lor repaire.
		Er a faig Desenors tot qu'anc volc faire,
	15	Qu'a forostada Honor de son paes,
		E i sson cregut Enian tan e No-fes
		Qu'an revirat vas totas part[z] lor gir,
		Q'a pena sai on posc'om pros gandir.
III		Ar vai son dol Larguesa demenan,
	20	Disen als cavaliers paubres cortes:
		«Seignor, e que fairem deserenan,
		«Pos to[u]tz nos es tan bos seignor e paire?
		«Per deu, non sai oi mais qe deiam faire.
		«Conseillatz vos qu'anem al Rei frances.
	25	«O al pro N'Adoart rei dels Angles?
		«E si i anam, volran nos acuillir?
		«Gran paor ai qe lor cara no·s vir».
IV		Enseignamenz e Valors qe faran?
		On trobe(i)ran manteing pos vos no·i es,
	30	Seigner onratz, qe·ls trasiatz enan?
		To[z] temps iran ab dol ez ab maltraire,
		Pos vos no·i es, q'eras sos emperaire
		E seigner sobre tot qu'anc fon ni es!
		Non sai on·s n'an, qar tan lor es mal pres,
	35	No pogra[n] mais anar tan ne venir,
		Qu'anc mais troben tan plaisen acuillir.
V		Dreitz e Vertatz e Vergoigna se·n van;
		Mensonia e Tortz vergoignatz de marves
		Remanon sai; mas trop mal canie fan
	40	Nostre Baron maior, ai mieu viaire;
		Que·i vei troblar terra e foc mar ez aire
		Quar regna Falsetat[z] e Bona Fes
		Se·n vai de cors, ez on la trobares?
		Prince, Baron, mout ve·n degratz marir,
	45	S'al cor aves talen de ben finir.
VI		Part totz los monz voill q'an mon sirventes
		E part totas las mars, si ia pogues
		Home trobar que·il saubes novas dir
		Del rei Artus e quan deu revenir.
VII	50	Ai, Cobeitatz, vos e vostres arnes
		Confonda Deus e totz vostres conres,
		Qu'aves iuven gastat, e faig delir
		Deport e iai ab vostre fals desir.