Chambers, Frank M.. Three Troubadour Poems with Historical Overtones. "Speculum", 54/1 (1979), pp. 42-54.

Code: 058,004 Auteur: Bernart de la Barta Genre: Sirventes Numero: III

Foilla ni flors, ni chautz temps ni freidura

I	1	Foilla ni flors, ni chautz temps ni freidura
		No·m fai chantar ni·m merma mon talen;
		Mas alor chant quant auch dir a la gen
		Que bens li deu venir qui ben s’agura
	5	(Dieus!) tota bon’aventura
		De patz! Ducs, qu’es coms e marques —
		E patz de clercs e de Frances!
II		Patz, si tot s’es bon’e ferma e segura,
		Patz d’amistat q’a tot estia gen,
	10	Patz q’a facha pros hom e leialmen,
		Patz com puosc’om ben amar ses rancura,
		Bona patz mi platz, cant dura;
		E patz forsada no·m platz ges:
		D’avol patz ven mais mals que bes.
III	15	En cort de rei deu hom trobar drechura,
		Et en Glesa merce e chausimen
		E franc perdon de mortal faillimen,
		Segon los ditz de la Sainta Escriptura.
		E reis deu gardar mesura,
	20	Car qui no·l garda res, peitz l’es;
		Luocs fora que dans l’en vengues.
IV		Si com hom mor de mortal forfaitura,
		Deu esser rics cel que de bon talen
		Serf bon seignor a poder lonjamen;
	25	Que·l bos seigner creis los sieus e·lz meillura,
		E·l malvatz fort se pejura;
		Per qe·m plagra fort c’om valgues
		Als pros et als malvatz nogues.
V		Reis deu amar et onrar sa natura,
	30	Et al meillor deu far meilluramen
		De mais d’onor e de mais d’onramen,
		E deu gardar sa cort de desmesura.
		E reis c’a de bon pretz cura
		Deu creire als valens, als cortes,
	35	Als plus onratz e meills apres.