Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,006 Auteur: Peire Rogier Genre: Vers Numero: III

Per far esbaudir mos vezis

I	1	Per far esbaudir mos vezis,
		que·s fan irat quar ieu no chan,
		no mudarai deserenan,
		qu’ieu no despley
	5	un so novelh que· ls esbaudey;
		e chant mais per mon Tort-n’avetz,
		quar trop dechai
		tot quan vey sai,
		mas lai ab lieys creys joys e pretz,
	10	per que·l sieus conortz m’es plus bos
		que tot quan vey sai entre nos.
II		De midons ai lo guap e·l ris,
		e suy fols, s’ieu plus li deman,
		ans dey aver gran joy d’aitan;
	15	a Dieu m’autrey;
		non ai donc pro car sol la vey?
		Del vezer suy ieu bautz e letz;
		plus no m’eschai,
		que ben o say,
	20	mas d’ aitan n’ai ieu joy e pretz
		e m’en fauc ricautz a sazos
		a guiza de paubr’ergulhos.
III		De totz drutz suy ieu lo plus fis,
		qu’a midons no dic re ni man
	25	ni·l quier gen fait ni bel semblan;
		cum qu’ilh m’estey,
		sos drutz suy et ab lieys dompney
		totz cubertz e celatz e quetz,
		qu’ilh no sap lay
	30	lo ben que·m fai,
		ni cum ai per lieys joy e pretz;
		ni·s tanh que ia·l sapch’enoios,
		qu’ieu suy sai sos drutz a rescos.
IV		Anc ieu ni autre no·lh o dis,
	35	ni elha non saup mon talan,
		mas a celat l’am atretan —
		fe qu’ieu li dey —
		cum s’agues fait son drut de mey;
		re no·m qual, que ia l’am eis setz. —
	40	Doncs amarai
		so qu’ieu non ai? —
		Oc, qu’eyssamen n’ai joy e pretz
		e son alegres e joyos,
		quant res non es, cum si vers fos.
V	45	Per s’amor viv, e se·n moris,
		qu’om disses qu’ieu fos mortz aman,
		fait m’agr’amors honor tan gran,
		qu’ieu sai e crey
		qu’anc a nulh drut mais tal non fey;
	50	vos jutgatz, dompn’, e destrenhetz!
		Car s’ieu m’esmay
		e si mal tray
		ni muer per vos, joys m’es e pretz:
		de vos m’es totz mals bes, dans pros,
	55	foldatz sens, tortz dregz e razos.
VI		Ieu mai que mai,
		ma donn’, ieu sai
		que vos mi donatz joy e pretz;
		e vuelh mais morir ad estros
	60	ia·l sapcha negus hom mas vos.
VII		Bastart, tu vay
		e porta·m lay
		mon sonet a mon Tort-n’avetz;
		e di·m a n’Aimeric lo tos
	65	membre·lh dont es e sia pros.