Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,004 Auteur: Peire Rogier Genre: Vers Numero: VI

Ges non puesc en bon vers fallir

I	1	Ges non puesc en bon vers fallir
		nulh’hora qu’ieu de midons chan;
		cossi poiri’ieu ren mal dir?
		Qu’om non es ta mal essenhatz,
	5	si parl’ab lieys un mot o dos,
		que totz vilas non torn cortes;
		per que sapchatz be que vers es,
		que·l ben qu’ieu dic tot ai de liey.
II		De ren als no pes ni cossir
	10	ni ai dezirier ni talan,
		mas de lieys quo·l pogues servir
		e far tot quant l’es bon ni·l platz;
		qu’ieu non cre qu’ieu anc per als fos
		mais per lieys far so que·l plagues,
	15	que be sai qu’onors m’es e bes
		tot quan fas per amor de liey.
III		Ben puesc los autres escarnir,
		qu’aissi·m suy sauputz trair’enan
		que·l mielhs del mon saupi chauzir;
	20	ieu o dic e sai qu’es vertatz;
		ben leu manz n’i aura gelos
		que diran, ‘Mens e non es res’;
		no m’en cal ni d’aco no m’es,
		qu’ieu me say cossi s’es de liey.
IV	25	Greus m’es lo maltraitz a sufrir
		e·l dolors, qu’ay de lieys tan gran,
		don no·m pot lo cors revenir;
		pero no·m platz autr’amistatz,
		ni mais joys no m’es dous ni bos,
	30	ni no vuelh que·m sia promes,
		que, s’ieu n’avia cent conques,
		ren no·ls pretz mais aquels de liey.
V		Bona dompna, soven sospir
		e trac gran pen’e gran afan
	35	per vos, cuy am mout e dezir;
		e quar no·us vey, non es mos graz;
		mas si be m’estau luenh de vos,
		lo cor e·l sen vos ai trames,
		si qu’aissi no suy on tu·m ves,
	40	[el ben qu’ieu ai totz es de liey.]
VI		Ailas! — Que plangz? — Ia tem murir. —
		Que as? — Am. — E trop? — Ieu hoc, tan
		que·n muer. — Mors? — Oc. — Non potz guerir? —
		Ieu no. — E cum? — Tan suy iratz. —
	45	De que? — De lieys, don suy aissos.
		Sofre. — No·m val. — Clama·l merces. —
		Si·m fatz. — No·y as pro? — Pauc. — No·t pes,
		si·n tras mal. — No? — Qu’o fas de liey.
VII		Cosselh n’ai. — Qual? — Vuelh m’en partir. —
	50	No far! — Si faray. — Quers ton dan. —
		Que·n puesc als? — Vols t’en ben jauzir? —
		Oc, mout. — Crei mi. — Era diguatz.
		Sias humils, francs, larcx e pros. —
		Si·m fai mal? — Sufr’en patz. — Suy pres?
	55	Tu oc, s’amar vols; mas si·m cres,
		aissi·t poiras jauzir de liey.
VIII		Mon Tort-n’avetz mant, s’a lieys platz,
		qu’aprenda lo vers, s’el es bos;
		e puois vol que sia trames
	60	mon dreit-n’avetz lai en Saves:
		Dieus sal e guart lo cors de liey.