Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,002 Auteur: Peire Rogier Genre: Vers Numero: IX

Dous’amiga, no·n puesc mais

 

                                                                                                                                                        

I	1	Dous’amiga, no·n puesc mais;
		mout me pesa qar vos lais,
		e (redol m’en) et esmais,
		e teng m’o a gran pantais,
	5	qar no·us abras e no·us bais
		e departen nostr’amor
II		D’aitant (sabeos) mon talan,
		q’anc femna non amei tan;
		e no·us (en) aus far semblan
	10	ni trob per cui vos o man.
		Vau m’en; a Dieu vos coman,
		al espirital seinhor.
III		Non puesc mudar qe no·m plagna,
		qar se part nostra compagna;
	15	eu m’en vauc en terr’estragna;
		mais am freidur’e montagna
		no fas figa ni castagna
		ni ribeira ni calor.
IV		Lai s’en vai mos cors marritz,
	20	e çai reman l’esperiz;
		et ai tant los uls fronçitz
		qe m’en dolon las raïtz;
		mal o fai qi·ns a partiz,
		e no·n puesc aver baudor.
V	25	Sans e sals for’eu gueritz,
		qant serai acondormiz,
		si fos de leis tant aisiz,
		q’en semblant d’una perniz
		li baises sos oils voltitz
	30	e la fresqetta color.
VI		Dous estars lai m’es ardura,
		e bons conortz desmesura,
		e sazïontas fraitura,
		e dias clars noitz oscura;
	35	per mon jovent qar pejura
		ai marriment e dolor.