Shepard,William P.. Two Provençal Tenzoni. "Modern Philology", 23.1 (1925), pp. 17-28

Code: 010,006=016,005 Auteur: Aimeric de Peguillan , Albertet Genre: Tenso (partimen) Numero: II

Amics Albertz, tensos soven

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

I	1	Amics Albertz, tensos soven
		Fan assatz tuit li trobador;
		E partisson razon d’amor
	4	E d’als qan lur plaiz, eissamen.
		Mas ieu faz zo q’anc hom non fes,
		Tenson d’aizo qi res non es;
		Q’a razon pro·m respondrias,
	8	Mas a nien vueil respondatz,
		Et er la tenzos de non-re.
II		N’Aimerics, pueis del dreg nien
		Mi volez far respondedor,
	12	No·i voil autre razonador
		Mas mi meteus, mon escien.
		Be·m par c’a razon respondes
		Qi respon zo qe res non es.
	16	Us nienz es d’autre compratz;
		Per qu’al nien don m’apellatz
		Respondrai com? Calarai me!
III		Albertz, ges callan non enten
	20	Que·l respondres aia valor;
		Ni mutz no respon a segnor
		E mutz no diz vertat ni men.
		S’ades callatz, com respondres?
	24	Ja parl ieu, qe·us ai escomes.
		Nient ha nom: done, s·l nomatz,
		Parlares, mal grat que n’aiatz,
		O no·i respondrez mal ni be.
IV	28	N’Aimerics, nuil essernimen
		No·us aug dir; anz parlatz error.
		Folia deu hom a follor
		Respondre, e saber a sen.
	32	Eu respon a “no sai qe s’es”,
		Com cil q’en cisterna s’es mes,
		Qe mira sos oils e sa faz,
		E s’el sona, sera sonatz
	36	De si meteus, q’als non i ve.
V		Albertz, cel sui ieu veramen
		Qi son’ e mira sa color,
		E aug la voz del sonador,
	40	Pueis eu vos son primeiramen;
		E·l resonz es nienz, so·m pes;
		Donc es vos —e no·us enoi ges—
		Nienz, s’aissi respondiatz;
	44	E si per tal vos razonatz,
		Ben es fols qi de ren vos cre.
VI		N’Aimerics, d’entrecimamen
		Sabetz, e fai vos hom lauzor;
	48	Si no·us entendon li pluzor
		Ni vos mezeus, so es parven.
		Et es vos en tal razon mes
		Don ieu issirai, mal qe·us pes,
	52	E vos remanretz eissaratz;
		E sitot mi matracejatz,
		Eu vos respon, mas no·us dic qe.
VII		Albertz, so q’eu vos dic vers es.
	56	Doncs dic eu qe hom ve non-res;
		Qar s’un flum d’un pont fort gardatz,
		L’ueil vos diran q’ades annatz
		E l’aiga can cor si rete.
VIII	60	Naimerics, non es mals ni bes
		Aizo de qe·us es entremes,
		Q’atrestan petit issigatz
		Qo·l molins q’a roda de latz,
	64	Qe·s mou tot jorn e no vai re.