Shepard, William Pierce. Two Derivitive Songs by Aimeric de Peguilhan. "Speculum",2.3 (1927), pp. 296-309

Code: 010,047 Auteur: Aimeric de Peguillan Genre: Canso Numero: II

Ses mon apleg no vauc ni ses ma lima

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

I	1	Ses mon apleg          no vauc ni ses ma lima,
		Ab que fabreg           motz et aplanh e lim,
		Car ieu no veg           d’obra suptil ni prima
		De nulha leg          plus suptil ni plus prim,
	5	Ni plus adreg          obrier en cara rima
		Ni plus pesseg          sos dicz ni mielh los rim.
		Mas el destreg          d’Amor, tan no m’escrim,
		Suy, fe que·us deg,       e no men val escrima.
II		Si per merce·          m fetz Amors apercebre
	10	La belha que          mos precs non apercep
		Que denhes me          per servidor recebre,
		Mout feira be,          e falh quar no·m recep.
		No sai per que          m’auci n·m vol decebre,
		Que bona fe          l’ai on plus mi decep.
	15	Non a en se          merce, si no·n soisep;
		Mais erguelh cre,          que no·n li cal soisebre.
III		Ben es d’amor          vuej’e de merce sema.
		Las! per que plor?          qu’elha m’a de joi sem;
		Que no·m socor,          ans se luenh’e s’estrema
	20	De mi, qu’aillor          vol que·m mut e m’estrem.
		Non a paor,          ni tan ni quan no trema
		De la dolor          don ieu fremisc e trem,
		Per qu’ai major          mal e·m par que plus crem,
		Quar del ardor          que m’art elha non crema.
IV	25	Tan doussamen          mi ve nafrar e ponher
		Qu’ieu non o sen,          ni no sai ab que·m ponh;
		Pueys ses enguen          mi sap guerir et onher
		Ab un plazen          esguart: ve·us ab que m’onh;
		Que fai mo sen          ab ma voluntat jonher
	30	Que d’un talen          los truep que·ls li’e·ls jonh,
		Per qu’ieu corren          venc vas lieys don mi lonh,
		Tan promet len          e fai de lonhor lonher.
V		Senes manjar,          dona·m poiriatz paisser
		Ab gen parlar,          que·l cortes digz me pays,
	35	Qu’ab esquivar          me tornatz en iraisser,
		Per qu’om blasmar          no·m deu si m’en yrays.
		Neis l’engraissar          en perc; qu’ieu fora graisser.
		Per autr’afar          no·m falh la carns ni·l grays;
		E s’ab prejar          en vos Merces no nays,
	40	Fora·m, so·m par,          mielhs que fossetz a naisser.
VI		Ab dous esgar          sap sos vezedors paisser
		Et ab honrar          N’Emilla cui joys pays,
		Qu’onor ten car          e pretz, qu’ab lieys renays,
		E domnejar          sofr’e·l fa renaisser.