Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Bibliographie
* Témoignage
* Appareil critique
* Notes
* Traductions
* Images

Shepard, William P.. A Provençal “Debat” on Youth and Age in Women. "Modern Philology",29.2 (1931), pp. 149-161

Code: 088,001 Auteur: Bertran de Preissac Genre: Sirventes Numero: I

Aras, quan plou e yverna

I 1
Aras, quan plou e yverna         
    E fresc’aura e buerna
    S’atrai e chai e desfuelha la verna,
  4 Fauc sirventes per esquerna
    D’Amor, qu’enaissi s’enferna,
    Que las joves an levad’a taverna.
    Tant an apres de falterna
  8 Que lur cons vendon a terna.
    Plus son arden non es lums en lanterna.
    Domnas tozas,   sofrachozas,   la vera paterna
    Vos cofonda   e·us rebonda   selh que·l mon governa!
  12 Qu’En Jausbertz   no’n es tan certz,   per los sanhs de Palerna,
    Qu’el pantais   del pel no·i lais,   si sec la vostr’esterna.
     
II  
Audebert, si de m’escola
    Voletz yssir, caus’es fola.
  16 Si las crezetz, no·us i tenra pro mola;
    Qu’ieu fui ja de lur corola
    E sai cum quascuna dola.
    Mais volon raubar qu’Aspes que degola.
  20 Ges raca pieitz non asola.
    Qu’elhas fan, s’om lor acola.
    Neys en mostier no·n pot gandir estola!
    Qui·n joventa   met s’ententa   no sap que·s virola;
  24 Mais en guerra   met sa terra   selh que las percola.
    Tan son leas   lur galeas   que lays ni viola
    No lur auta   menhs de rauta,   don quascuna tola.
     
III  
Jovens torn’en “no m’en calha,”
  28 Et Amors en comunalha,
    Mais las joves en trazon lur vitalha;
    Mas per nient se trabalha
    Mos Audebertz que lur valha,
  32 Quar desse I’auran mes tot en la palha.
    E par ben que sens li falha
    Qui donas joves engalha
    Ab las vielhas, que an pretz ses baralha;
  36 Quar gent gabon   e pueys sabon   far, per qu’om mais valha,
    Bona pauza   e ses nauza   e rica gazalha.
    Mais tozeta,   que·l prometa,   no·n perdra mezalha,
    Ans assaya   cum dechaya   son drut en nualha.
     
IV 40
Ben a de sen gran nescieira  
 
 
Drutz que dona joven quieira,
   
Que·l plus valen fai tornar en pauprieira;
   
Mas selhas de mieja teira
  44 Deu hom ponhar cum conquieira
    Lur amistat, quar an proez’ entieira,
    Quon plus es de jorns pleneira
    Val mais en tota manieira,
  48 Quar no desiron ges mercat ni fieira.
    Lur companha   es gazanha   enanz qu’om so mieira.
    Bon’alberga,   qui que·s perga,   fara voluntieira.
    Aital osta,   que no·m costa,   vuelh mais que no·m quieira,
  52 Melhs m·i colga   e m’afolga   que joves guerrieira.
     
V  
Er no sai cum mi captenha,
    Si·m lais d’amar o m’en fenha.
    De dos afars m’es ops que·l melhor prenha.
  56 Amors! e mals glais vos senha
    E selh qu’en vostra cort renha!
    Quar non etz tals que Midons s’en destrenha.
    Chaitius suy qu’elha no·m denha
  60 Amar, per que sieus devenha;
    E si·m destrenh plus que fuecx no fai lenha.
    Menhs suy savis   que gramavis   qui la gent essenha,
    Qu’ai tal anta   per garanta   que no s’endevenha.
  64 Dieus mi noga,   si no·m loga   joves e no·m senha,
    Si tal nova   no·n cug mova,   don ja bes no·l venha.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI