Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Code: 167,047 = 370,012 Auteur: Gaucelm Faidit , Perdigon Genre: Tenso (partimen) Numero: XII

Perdigons, vostre sen digatz

I	1	Perdigons, vostre sen digatz :
		que·us par de dos maritz gelos ?
		l'us a moller qu'es bella e pros,
		franca e cortesa e chausida,
	5	e l'autre laida e marrida,
		villana e d'avol respos ;
		quascuns es gardaire d'amdos :
		e pos tan fols mestiers lor platz,
		ni aital es lor voluntatz,
	10	quals en deu plus esser blasmatz ?
II		Gaucelm Faidit, ben vuelh sapchatz
		que de dompn'ab bellas faissos
		don totz lo mons es enveios,
		qui l'a pres de si aizida,
	15	non fai ges tan gran fallida,
		si la garda en'es cobeitos,
		cum l'autres desaventuros
		qu'es tan de totz mals aips cargatz
		qu'en gardar no·l forsa beutatz
	20	ni res mas laideza e cors fatz.
III		Perdigons, en fol razonatz ;
		e com auzetz anc dire vos
		qu'om tenga so qu'es belh rescos
		ni qu'om gart domna eissernida,
	25	bella, de valor complida ?
		doncs non la garda sos sens bos ?
		Mas la laida ab digz enoios
		deu gardar lo maritz senatz,
		per qu'om no veia sas foudatz
	30	ni cum el es mal molleratz.
IV		Gaucelm, entrels nescis agratz
		gent cubert blasme vergoignos ;
		pero mal cossellatz l'espos
		quan disetz qu'aia tal vida
	35	que gart sa mala escarida
		ni fassa d'un malastre dos ;
		mielhs a de gardar ochaizos
		bona dompna on es granz beutatz,
		don par qu'om sia enamoratz,
	40	e'n deu esser menhs encolpatz.
V		Perdigons, on plus en parlatz
		plus desmentetz vostras chansos,
		que gelosia es fols ressos,
		don totz lo mons brai' e crida
	45	que hom gart dompna eissernida,
		et es lagz blasmes entre nos :
		mas l’autres gardars es razos
		ses gelosia e ses peccatz,
		qu'om resconda so qu'es malvatz,
	50	e mostre so dont es honratz.
VI		Gaucelm, s'avol aver gardatz,
		d'avol thezaur etz poderos ;
		e no par ges sens cabalos
		qui pretz pert e joi oblida
	55	per malvaiza cauza aunida ;
		mas quan per bel aver joios
		falh ni trebalh'en a sazos,
		d'amor par que sia forsatz,
		e si d'aquo·us meravilhatz,
	60	be·m meravilh si vos amatz.
VII		Totz temps duraria·l tensos,
		Perdigons, per qu'ieu vuelh e·m platz
		qu·el Dalfin sia·l plaitz pauzatz
		qu'el jutge e·l acort en patz.
VIII	65	Gaucelm, tant es vera·l razos
		qu'ieu defen e elh tan senatz
		que, s'en lui es lo plaitz pauzatz,
		vuel que per lui sia jutjatz.