Aston, S. C.. Peirol. Troubadour of Auvergne. Cambridge: University Press, 1953

Code: 366,026 Auteur: Peirol Genre: Canso Numero: XVI

Per dan que d’amor mi veigna

I	1	Per dan que d’amor mi veigna
		non laissarai
		que joi e chan no manteigna
		tan cant viurai;
	5	e si·m sui en tal esmai
		non sai que·m deveigna,
		quar cill, on mos cors m’atrai,
		vei qu’amar no·m deigna.
II		Neguna bon’ entresseigna
	10	de lieis non ai
		que ja merces pro m’en teigna
		del mal qu’ieu trai.
		Pero si la preiarai
		que de mi·l soveigna;
	15	que, s’amors no la·m atrai,
		merces la·m destreigna.
III		Bona domna, si·us plazia
		fort m’amistatz,
		quals miravilha seria
	20	si m’amavatz!
		Mas aoras quar no·us platz,
		si jois m’en venia
		conosc que mout majer gratz
		vos en taigneria.
IV	25	La nuoich mi trebaill e·l dia
		no·m laiss’ en patz,
		si m’angoissa·l cortesia
		e la beutatz.
		Las! que farai mais que fatz
	30	tro·l desirs m’aucia
		o l’en prenda pietatz
		que plus franca·m sia?
V		Tant ai en lieis ferm coratge
		qu’en als non pes
	35	et anc, ses talan volatge,
		mieills n’amet res.
		Per so·m degra venir bes,
		e ai eu dampnatge!
		Gardatz s’en amor agues
	40	de pejor usatge!
VI		Chanssos, vai t’en dreich viatge
		lai on ill es,
		qu’el mon non ai mais messatge
		que·l trameses.
	45	E puois del tot me sui mes
		el sieu seignoratge,
		preia li non aia ges
		vas mi cor salvatge.
VII		A! dompna, calsque merces
	50	vos n’intr’ el coratge,
		c’aleviar pot petitz bes
		lo mieu gran dampnatge.