Aston, S. C.. Peirol. Troubadour of Auvergne. Cambridge: University Press, 1953

Code: 366,005 Auteur: Peirol Genre: Sirventes Numero: XXVI

Ren no val hom joves que no·s perjura

I	1	Ren no val hom joves que no·s perjura
		per salvar plus cant el tol sagramen;
		e s’ieu per mal ni per paor de ven
		covenc a Dieu qu’eu non chantes aura,
	5	pos nostre temps si meillura,
		trobarai que fort ai mespres.
		Perdon me Dieu si l’ai repres!
II		En respeig son d’aver bon’ aventura,
		car ades ai maltrag e mon joven;
	10	mas anc no·m plac sojornz entr’ avol gen,
		per c’ai maint jorn e mainta noit escura
		suffert e chaut e freidura,
		qe·m loingnes de vil’ e paes
		per segre comte pro e cortes.
III	15	Jamais nuls hom non faria rancura
		de mercadiers, so sai certanamen,
		si vezia com gazaignon l’argen
		ni co·s meton en mar ad aventura.
		De tot me sui donatz cura,
	20	can an bon temps e non l’an ges,
		tot m’o teng a sojorn de pres.
IV		Anc la bella ben faita per centura
		non desirei mais c’ara per un cen
		non dezir mais e garbin e ponen,
	25	et autres venz, can si fan per mesura.
		Et nel port a gran largura,
		c’om conosca can bons temps es,
		en Blachas non o sap ges res.
V		S’anc baordei ni anei d’ambladura,
	30	per caval pren nostra nau can cor gen,
		e per escut la gran vela al ven,
		e per lansa l’antenna fort e dura,
		e per esperon l’amura,
		e·ls timos prenc ades per fres
	35	et per sella e per arnes.