Stimming, Albert. Der Troubadour Jaufre Rudel, sein Leben und seine Werke. Berlin: August Hettler, 1873

Code: 262,004 Auteur: Jaufre Rudel de Blaja Genre: Canso Numero: III

Pro ai del chan essenhadors

I	1	Pro ai del chan essenhadors
		entorn mi et ensenhairitz :
		pratz e vergiers, albres e flors,
		voutas d’auzelhs e lais e critz,
	5	per lo dous termini suau,
		qu’en un petit de joi m’estau ;
		don nulhs deportz nom pot jauzir
		tan cum solatz d’amor valen.
II		Las pimpas sian als pastors,
	10	et als enfans bordeitz petitz,
		e mias sion tals amors,
		don ieu sia jauzens jauzitz ;
		qu’ieu la sai bona tot aitau
		ves son amic en greu loguau
	15	[per so sui trop soen marritz,]
		quar non ai so qu’al cor n’aten.
III		Luenh es lo castelhs e la tors,
		ont elha jai e sos maritz,
		e si per bos cosselhadors
	20	cosselhan no sui enantitz,
		qu’autre cosselhs petit m’en vau,
		aitant n’ai fin talan corau :
		al res noi a mais del murir,
		s’alquun joi non ai en breumen.
IV	25	Totz los vezis apel senhors
		del renh, on sos jois fo noiritz,
		e crei, quem sia grans honors,
		quar ieu dels plus envilanitz
		cug que sion cortes, lejau ;
	30	ves l’amor, qu’ins el cor m’enclau,
		ai bon talant e bon albir
		e sai, qu’ilh n’a bon escien.
V		Lai es mos cors si totz, c’alhors
		non a ni sima ni raitz,
	35	et en dormen sotz cobertors
		es lai ab lieis rnos esperitz ;
		e s’amors mi revert a mau,
		car ieu l’am tant e liei non cau ;
		tost verai ieu, si per sufrir
	40	n’atendrai mon bon jauzimen.
VI		Ma voluntatz s’en vai lo cors
		la nueit el dia esclarzitz
		laintz per talant de son cors ;
		mas tart mi ve e tart rni ditz :
	45	,,amicx, fas elha, gilos brau
		an comensat tal batestau,
		que sera greus a departir,
		tro qu’abdui en siam jauzen“.
VII		Per so m’en creis plus ma dolors,
	50	car ieu au lieis en luecs aizitz,
		que tan no fauc sospirs e plors,
		que sol baizar per escaritz,
		quel cor mi tengues san e sau ;
		bona es l’amors e molt per van,
	55	e d’aquest mal mi pot guerir,
		ses gart de metge sapien.