Stimming, Albert. Der Troubadour Jaufre Rudel, sein Leben und seine Werke. Berlin: August Hettler, 1873

Code: 262,001 Auteur: Jaufre Rudel de Blaja Genre: Canso Numero: IV

Belhs m’es l’estius el temps floritz

I	1	Belhs m’es l’estius el temps floritz,
		quan l’auzelh chanton sotz la flor,
		mas ieu tenc l’ivern per gensor,
		quar mais de joi mi es cobitz ;
	5	e quant hom ve son jauzimen,
		es ben razos e d’avinen,
		qu’om sia plus coindes e guais.
II		Er ai ieu joi e sui jauzitz
		e restauratz en ma valor
	10	e non irai jamai alhor
		ni non querai autrui conquitz ;
		qu’eras sai ben az escien,
		que selh es savis, qui aten,
		e selh es fols, qui trop s’irais.
III	15	Lonc temps ai estat en dolor
		e de tot mon afar marritz,
		qu’anc no fui tan fort endurmitz,
		que nom rissides de paor ;
		mas aras vei e pes e sen,
	20	que passat ai aquelh turmen
		e non hi vuelh tornar jamais.
IV		Mout mi tenon a gran honor
		tug silh, cui ieu n’ei obeditz,
		quar a mon joi sui revertitz,
	25	e laus en lieis e dieu e lor,
		qu’er an lur grat e lur prezen,
		e que qu’ieu m’en anes dizen,
		lai mi remanh e lai m’apais.
V		Mas per so m’en sui escharitz,
	30	ja non creirai lauzenjador,
		qu’anc no fui tan lunhatz d’amor,
		qu’er non sia sals e gueritz ;
		plus savis hom de mi mespren ;
		per qu’ieu sai ben az escien,
	35	qu’anc fin’amor home non trais.
VI		Mielhs mi fora jazer vestitz
		que despolhatz sotz cobertor,
		e puesc vos en traire auctor
		la nueit, quant ieu fui assalhitz ;
	40	totz temps n’aurai mon cor dolen,
		quar aissis n’aneron rizen,
		qu’enquer en sospir en pantais.
VII		Mais d’una re soi en error,
		en estai mos cors esbaitz,
	45	que tot, can lo frairem desditz,
		aug autrejar a la seror ;
		e nulhs hom non a tan de sen,
		que puesc’ aver cominalmen,
		que ves calque part non biais.
VIII	50	El mes d’abril e de pascor,
		can l’auzel movon lurs dous critz,
		adoncs vuelh, mos chans si’ auzitz,
		et aprendetz lo, chantador ;
		e sapchatz tug cominalmen,
	55	qu’ ieum tenc per ric e per manen,
		car soi descargatz de fol fais.