Eichelkraut, Franz. Der Troubadour Folquet de Lunel. Berlin: W. Weber, 1872

Code: 154,001 Auteur: Folquet de Lunel Genre: Canso Numero: II

Al bon rey qu’es reys de pretz car

I	1	Al bon rey qu’es reys de pretz car,
		reys de Castell’ e de Leo,
		reys d’aculhir e reys d’onrar,
		reys de rendre bon guiardo,
	5	reys de valor e reys de cortezia,
		reys a cuy platz joys et solatz tot l’an;
		qui vol saber de far bos faitz s’en an,
		qu’en luec del mon tan be nols apenria.
II		Quar el ten cort, on fadiar
	10	nos pot nulhs hom bos en son do,
		e cort ses tolre, ses forsar,
		e cort, on escot’om razo,
		cort ses erguelh e cort ses vilania
		e cort, on a cent donadors, que fan
	15	d’aitan ricx dos mantas vetz ses deman,
		cum de tals reys qu’ieu sai, qu’il lor queria.
III		Mais un rey nol sai contrapar
		de largueza, s’agues tan bo
		poder cum el a de donar,
	20	so es lo francs reys d’Arago,
		qu’a tan son cor en valor, quel faria
		pauc tot lo mon acomplir lo talan,
		qu’a en donar e dari’atretan
		cum hom del mon, don Peire, s’o avia.
IV	25	Mas d’aissom fan meravilhar
		l’eligidor, qu’eligit so,
		que puescon emperador far,
		cum nol meto en tenezo
		del emperi selh a cuy tanheria:
	30	lo valen rey nAnfos. qu’a pretz prezan;
		qu’om del mon miels non tenc cort ab boban,
		creyssen de pretz e d’onor tota via.
V		Qu’entrels Lombartz auzi contar,
		quel Alaman el Bramanso
	35	el Roman, ses tot contrastar,
		volon a luy la lectio
		del emperi, e Milan e Pavia
		Cremon’ et Ast e Ginoes an gran
		cor, quel bon rey castellan recebran
	40	a gran honor, si ven en Lombardia.
VI		E quil papa pogues citar
		a major de se fora bo,
		quar del rey nAnfos no vol far,
		e del rey Carle bon perdo;
	45	e qu’om rendes nEnric, qu’ora seria,
		el emperis non estes pus vacan,
		e pueys ab totz los reys, que baptism’an,
		anes venjar Jhezu Christ en Suria.
VII		Reys castellas, vostra valors se tria
	50	part la valors, que tug l’autre rey an,
		e miels sabetz gardar home de dan
		que venh’ a vos qu’autre reys qu’el mun sia.
VIII		Mon sirventesc, Bernat, leu ses fadia
		en Castella portatz a don Ferran,
	55	e digatz li, ques tenh’ ades denan
		qui es ni don, e fara bona via.