Jeanroy, A.. Poésies provençales inédites d'après les manuscrits de Paris. "Annales du Midi", 17 (1905), pp. 457-489

Code: 106,023 Auteur: Cadenet Genre: Canso Numero: II

S'ieu·s essai ad amar

I	1	S'ieu·s essai ad amar,
		Vos cui am e ten car
		E dupt e blan,
		No m'en devetz mostrar
	5	Pus orgulhos senblan,
		Qu'ieu vos am tan
		Qu'el mon non es
		Neguna res
		Qu'ieu pesses que·us plagues
	10	Que no me fos bon' e leugier' a faire.
II		Qu'ieu non ai ren a far
		Mas vostre pretz lauzar
		De bon talan,
		E, si mezura·us par,
	15	Tro qu'ieu mais vos deman,
		Un belh semblan
		De vos agues,
		Tro·l mielhs vengues,
		Q’aissi m’avetz conques
	20	Qu'autra no·m pot del cor la dolor traire.
III		E si·us platz, un baisar
		Mi podetz ben donar
		Ses vostre dan;
		Del plus no·us aus preyar,
	25	Mas termini venran:
		Parlem enan,
		Belh cors cortes:
		So qu’ieu·s ai ques
		Er mi dat o promes?
	30	Diguatz m'en tot so qu'a vos n'er veyayre.
IV		E poirai m'en fizar
		En l'amoros esguar
		Plazen que·m fan
		Vostr' uelh rizen e clar?
	35	E s’o fan per enjan
		Gran pecat n'an,
		Qu'aissi cum es
		Caps de totz bes
		Lo reys araguones.
	40	Aissi am ieu meils de negun amaire.
V		Que farai, pus laissar
		No·m puesc de vos preiar?
		Murrai aman?
		Non, per mon grat, enquar,
	45	Tro vostre cors prezan
		Abras baizan:
		Ai, franca res.
		Precx e merces
		Mi deu valer e·ls bes
	50	Qu'ieu aus de vos en mas chansos retraire.
VI		En Engolmes
		Agra trames
		Mon chantar, mas no·y es
		La francha pros comtessa de bon aire.