Appel, Carl. Poésies provençales inédites tirées des manuscrits d’Italie. "Revue des langues romanes", 34 (1890), pp. 5-35

Code: 010,016 Auteur: Aimeric de Peguillan Genre: Canso Numero: [II]

Chantar vuilh. - per qe? - ia·m platz.-

I	1	Chantar vuilh. - per qe? - ia·m platz.-
		ia te·n eras tu laichatz? -
		o eu. - fols es tu. qin' es
		de cui chantas? - fola res,
	5	de la gensor q'el mon sia. -
		oc, ben leu; mas si tu·l cres,
		altre no·l te creiria ges. -
		per deu, si faria
II		toz hom qe vis sas beutatz. -
	10	es tan pros com lo·m lauçaz? -
		la melher q'anc dieus feçes. -
		doncs fas tu ben qe crotes. -
		et eu, fol, no t'o diçia?-
		si be. - doncz, de qe·m mescres? -
	15	sai, si es, platz mi e sos bes. -
		no·m entremetria,
III		sai, si no fos la vertatz. -
		era, vos, qar me digaz! -
		e qe? - ama·us tan ni qan? -
	20	vai tu, mensongier truan;
		ela per qe m'ameria?
		en tant qant soleilhs resplan,
		n'a tan pro ni tan preçan.
		fol, co·s tanheria
IV	25	a mi sos genz cors hondratz? -
		Ben es doncs nesis e fatz. -
		cum? - car as mes tot afan,
		a guisa de fol aman,
		la on ga res no·t valdria. -
	30	cre me tu qe merseian
		aman sirven e preian
		conqer hom amia
V		tost o tard, don ... - er auiatz
		qe be·n es hom enguanatz. -
	35	non es ges. Saps qe m'a sors? -
		eu no. - us conortz: q'amors
		restaura tot en un dia
		qant qe a mesfait alhors,
		per qe·m sofri sas dolors
	40	en paç tota via
VI		e·ls afans qe m’a tardatz.
		las, eu mur! - cum? - soi nafratz. -
		qui·t nafret?- del mon la flors. -
		qe flors es?- de las melhors. -
	45	per qe fetz? - qar se volia. -
		be·l cre; don atens socors?-
		de leis, qe sa granz valors
		m'es suaus medgia.
VII		garir ses leis no poiria
	50	per re de mas greus dolors,
		q'asi·m nafret gent s'amors,
		no·n sai con m'estia.
VIII		Na Beatrix, cui iois guia,
		d'Est, q'es flors de las gensors
	55	e mellier de las meillors,
		meillura tot dia.