Eichelkraut, Franz. Der Troubadour Folquet de Lunel. Berlin: W. Weber, 1872

Code: 154,006 Auteur: Folquet de Lunel Genre: Canso mariana Numero: V

Si quon la fuelh’ el ramelh

I	1	Si quon la fuelh’ el ramelh
		creys el guai temps de pascor,
		e creys lo frugz de la flor
		per gaug del dou temps novelh,
	5	creys mos chans e renovelha,
		quar aug dire qu’anc nos seys
		plus francx coms ni plus adreys,
		e quar de tal dompna so,
		qu’anc no fes ni dis mas pro.
II	10	Tan son li fach el dich bo
		de mi dons, qu’om a razo
		ques jaus d’amor sel empeys
		en amar lieys, qu’anc nos feys
		de far so, per ques capdella
	15	fis pretz, qu’a tant en capdelh
		que ley . . . . . . cor
		. . . . en lauzor honor
		son cors de totz mals piusselh.
III		L’apreyador conhdar elh
	20	no vol ni entendedor,
		mi dons, mas fin amador,
		non fenhedor ni yrnelh
		ni es fenhens ni yrnelha,
		ni anc nos miret nis peys,
	25	ni escotet ges dompneys,
		ni anc fis amans nol fo,
		ses cobrar bon gazardo.
IV		Tant es de bona faisso
		mi dons, que melhoirazo
	30	noy vol, quar anc non ateys
		dompna de las doas leys
		en tan haut pretz; tant es bella
		sa valors quom dieus, es belh
		tot quan fai, el preyador
	35	sieu son mai el lauzador
		que d’autra, qu’om dompn’apelh.
V		Ancaram mou dreg simbelh,
		qu’ieu del comte, mo senhor,
		de Rodes fassa lauzor,
	40	car es el cap del castelh
		de valor, que de Castelha
		trol cap del mon coms ni rey
		del sieu poder mielhs no creys
		de fin pretz, ni anc no fo
	45	qu’al vis, sal del comt Hugo.
VI		Reyna maire piussella,
		filha de paire piusselh,
		vos tenc ieu per ma gensor,
		el pros coms ditz gran error
	50	de Rodes qu’autrans apelh.
VII		Empero breg’e tinelha
		vuelh aver tostemps ab eys,
		tro que del maldir se fleys,
		quem ditz de vos mas quan co
	55	sieus li prez en ma chanso.