Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Code: 349,005 Auteur: Peire Milo Genre: Canso Numero: [IV]

Pos l'uns auzels envas l'autre s’atura

I	1	Pos l'uns auzels envas l'autre s’atura
		de lais, de critz, de voutas, de chantar,
		e per amor de plaire s'esbaudeia
		e·il riu son clar qi corren per valeia,
	5	ben son doncs fols, q'en amor no·m atur,
		e car no soi ara gai e chantaire,
		pois c'aissi es, eu chant e m'esbaudei,
		e pois q'eu vei reverdir bosc e prea.
II		Per vos, amors, chascuns hom se meillura.
	10	car hom n'es larcs e cortes et sap far
		tot chauzimen, e per vos si domneia
		drutz en chambra ab sa domna privea.
		ben soi iratz car. per vos non meillur
		e car non saup ancar qe fos a faire;
	15	non sap qe fos domneiar ni domnei,
		qe ma domna del tot s'en es alea.
III		Qe·l iorn q'ela se mira, non a cura
		de negun hom qe la pogues amar,
		ni non auzira hom qi la veia,
	20	per q'ieu volgra qe·l mirador fos spea.
		iurar vos puesc, domna, qe d'als non cur
		ester de vos, de cui sui fiz amaire.
		cant vostre cors avinent gart e vei,
		mi par qe Deu sia en la contrea.
IV	25	Ai, franca res, non siatz tant endura,
		pois qe sabez q'eu no m'en puesc strar;
		cant penz de vos, e non sai con se seia,
		tot m'art del dol lo ventre e la coreia;
		e ia non vol razon qe l'om s'endur
	30	enver celui qi no s'en pot estraire
		de lei amar, de servir, on si sei;
		mas tal razo a vos nes agrea.
V		De tolz bos aibs poia, e donc peiura,
		car il merces a leis non vol atrar.
	35	ar qe farai, pois merces no·n l'autreia?
		eu atendrai, d'aitant l'ai afieia.
		que meillurar vol avanz q'eu peiur,
		e si·l plagues q'ela·m degnes atraire,
		pois qe sos om liges a li m’autrei,
	40	er ben s’orgoil en li fos avalea.