De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 133,011 Auteur: Elias Cairel Genre: Canso de creuada Numero: LXXIX

Qui saubes dar tant bon conseil denan

I	1	Qui saubes dar tant bon conseil denan
		Cum fai apres, qand al dampnatge pres,
		Ja negus hom non fora sobrepres;
		E doncs per que se vai chascus tarzan
	5	Ni eslognan     d’aquel Seignor servir
		Qui volc per nos mort e pena soffrir?
		Per so nos deu hom tarzar de ben faire,
		C’apres la mort lo cosseils non val gaire.
II		Gaire non val, qand hom a pres lo dan;
	10	E de lor dan faire son ben apres
		Li comte el rei eil baron eil marques
		Qe l’us l’autre s’auci’en gerrejan;
		Aissi faran     Crestiantat perir!
		E degron mieills Turcs e pajans aucir
	15	E recobrar lo dreiturier repaire,
		Jherusalem, e conquistar lo Caire!
III		Qu’ai Caire son Arabit e Persan,
		Cordin e Turc de paor entrepres;
		Et anc payes tant leu non fo conqes
	20	Cura cel fora; car ill s’en van doptan,
		Q’en lor sortz an     trobat, senes faillir,
		Qe Crestian devon sobr’els venir
		E la terra conqistar e desfaire;
		El termes es vengutz, al mieu vejaire.
IV	25	Vejaire m’es qe negus no sap tan
		De gen parlar qe retraire pogues
		Las grans honors, las riquessas nils bes
		Qe auran cill que de lai passaran;
		Doncs, per que fan     semblansa d’acropir
	30	Li ric malvatz, ques degron esgauzir
		E qui mieills mieills vas lo passage traire,
		Si c’om pogues lur mais a ben retraire?
V		Retraire voill als Crozatz que lai van
		Lo drech camin del viatge cals es:
	35	Per Ongria en terra de Grezes;
		Qe ja negun revel no i trobaran,
		E socorran     lieis on Dieus volc complir
		Totas bontatz, per c’om la deu grazir:
		L’emperairitz Yolen, c’ab maltraire
	40	Al loc don fo Manuels emperaire.
VI		Emperaire Frederic, ieu vos man
		Que de son dan faire s’es entremes
		Vassals, qand a a son seignor promes
		So dond li faill a la besoigna gran;
	45	Per qu’ieu, chantan,     vos voill pregar e dir
		Qe passetz lai on Ihesus volc morir
		E noill siatz a cest besoing bauzaire,
		Car jes lo filh no deu atendrel paire.
VII		Marques Guillem, lo sojorn nil dormir
	50	De Monferrat non voletz jes gurpir?
		Tart vengaretz la mort de vostre paire
		Nil deseret c’om fai a vostre fraire!
VIII		Beus pot hom dir malvatz fill de bon paire,
		E pesam fort, mas non puosc alre faire.