De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 156,003 Auteur: Falquet de Romans Genre: Canso Numero: LXXXVII

Cantar vuolh amorosamen

I	1	Cantar vuolh amorosamen,
		Situt no vei fuolha ni flor;
		Que frec nom fai ne gels paor,
		Tant ai lo cor gai e gausen;
	5	E autressim plai alegrars
		D’iverns com d’estiu o cantars,
		Puois per servidor mi rete
		Tais qu’es complida de tut be.
II		Anc domna non m’er tan plaisen
	10	Ni ab tan entera valor:
		Et a be plus fresca color
		Que rosa ni flors d’angilen,
		Bella bocha, bels voltz e nars;
		Et estai li tant gen parlars
	15	C’a nuls temps no vos dira re
		Mas onors e plazers e be.
III		E sapchatz c’anc plus coralmen
		Non amet Floris Blanciflor
		Qu’ieu am lieis quem val em socor;
	20	E noi son privatz d’avol gen;
		Ja mi no plai aprivasars
		Ab un croi, ni trop consilhars
		Ab lausengier, car qui los cre
		Pro fai de mal e pauc de be.
IV	25	Ogonet, portam per presen
		Ma canson a l’Emperador,
		Qu’el sap ben triar lo melhor,
		Tant a de valor e de sen;
		E par ben als sieus rics afars
	30	S’el s’es pros, qu’anc no fo sos pars;
		Co plus om retrai que i ve,
		Ades i trop om mais de be.
V		Emperaire, bels senher cars,
		No cre que sia plus francs bars
	35	Quel coms de Caret, que mante
		Pretz e fai tuz jortz mais de be.