De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 457,021 Auteur: Uc de Sant Circ Genre: Sirventes Numero: XCVIII

Messonget, un sirventes

I	1	Messonget, un sirventes
		M’as quist, et donar lo t’ai
		Al plus tost que ien poyrai
		El son d’En Arnaut Plagues;
	5	Qu’autr’aver not donaria,
		Que non l’ai, ni, si l’avia,
		Non t’en seria amics;
		Que, s’era de mil marcx ricx,
		D’un denier no t’en valria.
II	10	Qu’en tu non es nulla res
		De so qu’a joglar s’eschai,
		Que tos chans no val ni play,
		Ni tos fols ditz non es res;
		E croya es ta folia
	15	E paupra ta joglaria
		Tan que, si no fos N’Albricx
		El Marques, que es tos dicx,
		Nulhs hom no t’albergaria.
III		Mas d’una re t’es ben pres:
	20	Que d’aisso qu’aras pus play
		As pus qu’anc non aguist may:
		Follia e nescies;
		E, si negus hom que sia
		De ta folhor te castia,
	25	Tu non creiras sos casticx,
		Quar per follor t’es abricx
		Tals que per sen not volria.
IV		Per tu blasmon lo Marques
		Li croy joglar el savai
	30	Per lo ben que elh ti fai;
		Per qu’ieu vuelh qu’en Verones,
		Al Comte, tenhas ta via:
		Mal dig, que mais li valria
		Us braus balhestiers enicx
	35	Que traisses als enemicx,
		Que s’ieu tu li trametia.