De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 156,011 Auteur: Falquet de Romans Genre: Sirventes Numero: CX

Quan cug chantar, eu planc e plor

I	1	Quan cug chantar, eu planc e plor
		Per so quen vei esdevenir;
		Car per pauc no muer de dolor,
		Quan en mon cor pens e cossir
	5	La perd’el gran dampnatge
		Qu’a pres cortezia e solatz,
		Que, si de servir vos mesclatz
		Nius donatz alegratge,
		Totz diran queus etz fols provatz,
	10	Si de tot joi no vos laissatz.
II		Tornatz es en pauc de valor
		Lo segle, quil ver en vol dir;
		El clergue son ja li pejor,
		Que degran los bes mantenir,
	15	Et an aital uzatge
		Que mais amon guerra que patz,
		Tan lur plai malez’e peccatz;
		Per qu’al premier passatge
		M’en volria esser passatz;
	20	Quel mais de quan vei mi desplatz.
III		E son ves els mezeis trachor
		Li ric malvat; per quels azir,
		Qu’il an uelhs e non an lugor
		Nin re no sabon avenir
	25	Que sia d’agradatge;
		Qu’aissils eissorba cobeitatz,
		Enjans, feuni’e malvestatz
		Que perdut an paratge;
		E per aisso pert sas clardatz
	30	Pretz e valors e lialtatz.
IV		Ben volgr’aguessem un senhor
		Ab tan de poder e d’albir
		Qu’als avols tolges la ricor
		E nols laisses terra tenir,
	35	E dones l’eretatge
		A tal que fos pros e prezatz,
		Qu’aissi fol segles comensatz,
		E noi gardes linhatge;
		E mudes om los rics malvatz
	40	Cum fan Lombart las poestatz.
V		Ar prec al bon Emperador,
		Que s’es crozatz per Dieu servir,
		Que mov’ab fors’et ab vigor
		Ves la terr’on Dieus volc murir
	45	E mes son cors en gatge
		Per nos, en fon en crotz levatz;
		Et es totz oms desesperatz
		Qui no i a ferm coratge,
		Qui ve com El fo clavellatz
	50	Per nos, e batutz e nafratz.
VI		Tut deuriam aver paor
		Quar melh no li sabem grazir
		So qu’El sofri per nostr’amor;
		Qu’El receup mort per mort aucir,
	55	Tan volc nostr’omenatge;
		Per que fo de bon’ora natz
		Totz om quil servira crosatz
		Ni faral sieu viatge;
		Qu’anc, pos qu’El fo deseretatz,
	60	Non ac onor Cristiandatz.
VII		Emperaire, si beus pessatz
		Cum Dieus fai vostras voluntatz,
		Mout L’auretz bon coratge:
		Qu’El vol, et es ver, so sapchatz,
	65	Que vos cobretz sas eretatz.
VIII		Sirventes, Moncenis passatz
		Et a ’N Oth del Carret digatz
		Qu’ieus tramet per massatge:
		Qu’el s’an lai on Jesus fo natz;
	70	Puois er son bon pretz coronatz.