De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 217,002 Auteur: Guilhem Figueira Genre: Sirventes Numero: CXV

D’un sirventes far     en est son que m’agenssa

I	1	D’un sirventes far     en est son que m’agenssa
		Nom vuolh plus tarzar     ni far longa bistenssa;
		E sai, ses doptar,     qu’ieu n’aurai malvolenssa,
		Car fauc sirventes
	5	Dels fals, malapres
		De Roma, que es
		Caps de la dechasenssa,
		On dechai totz bes.
II		Nom meravilh ges,     Roma, si la gens erra,
	10	Quel segle avetz mes,     en trebalh et en gerra;
		E pretz e merces     mor per vos e sosterra,
		Roma enganairitz,
		Qu’etz de totz mals guitz
		E cima e razitz;
	15	Quel bos Reis d’Englaterra
		Fon per vos trahitz.
III		Roma trichairitz,     cobeitatz vos engana,
		C’a vostras berbitz     tondetz trop la lana;
		Lo sains Esperitz     que receup carn humana
	20	Entenda mos precs
		E franha tos becs,
		Roma! No m’entrecs,
		Car es falsa e trafana
		Vas nos e vas Grecs!
IV	25	Roma, als homes pecs     rozetz la carn e l’ossa,
		E guidatz los secs     ab vos inz en la fossa,
		E passatz los decs     de Dieu, car trop es grossa
		Vostra cobeitatz,
		Car vos perdonatz
	30	Per deniers pechatz;
		Roma, de gran trasdossa
		De mal vos cargatz.
V		Roma, ben sapchatz     que vostra avols barata
		E vostra foudatz     fetz perdre Damiata;
	35	Malamen renbatz,     Roma! Dieus vos abata
		En dechazemen,
		Car trop falsamen
		Renhatz per argen,
		Roma de mal’esclata
	40	E de mal coven!
VI		Roma, veramen     sai eu, senes doptanssa,
		C’ab galiamen     de falsa perdonanssa
		Liurez a turmen    lo barnatge de Franssa
		Lonh de Paradis;
	45	El bon rei Lois,
		Roma, avetz aucis,
		C’ab falsa predicanssa–
		l traissetz de Paris.
VII		Roma, als Sarrazis     faitz vos pauc de dampnatge,
	50	Mas Grecs e Latis     metetz e carnalatge;
		Inz el foc d’abis,     Roma, faitz vostre estatge,
		En perdicion;
		Ja Dieus part nom don,
		Roma, del perdon
	55	Ni del pelegrinatge
		Que fetz d’Avinhon!
VIII		Roma, ses razon     avetz mainta gen morta,
		E jes nom sab bon     car tenetz via torta,
		Qu’a salvacion,     Roma, serratz la porta;
	60	Per qu’a mal govern
		D’estiu e d’invern
		Qui sec vostr’estern,
		Car diables l’en porta
		Inz el fuoc d’Enfern.
IX	65	Roma, beis decern     lo mais c’om vos deu dire,
		Quar faitz per esquem     dels Crestians martire;
		Mas en cal quadern     trobatz c’om deja aucire,
		Roma, ’ls Crestians?
		Dieus, qu’es verais pans
	70	E cotidians,
		Me don so qu’en desire
		Vezer dels Romans.
X		Roma, vers es plans     que trop foz angoissosa
		Dels perdons trafans     que fetz sobre Tolosa:
	75	Trop rozetz las mans     a lei de rabiosa,
		Roma descordans !
		Mas, sil Coms prezans
		Viu ancar dos ans,
		Fransa n’er dolorosa
	80	Dels vostres engans.
XI		Roma, tant es grans     la vostra forfaitura
		Que Dieu e sos sans     en gitatz a non-cura;
		Tant etz mal renhans,    Roma falsa e tafura,
		Per qu’en vos s’escon
	85	Eis magra eis cofon
		Lo jois d’aquest mon;
		E faitz gran desmesura
		Del comte Raimon.
XII		Roma, Dieus l’aon     elh don poder e forsa,
	90	Al Comte, que ton     los Frances els escorsa,
		E fa ’n planca e pon,     quand ab els se comorsa;
		E a mi plaz fort ;
		Roma, a Dieu recort
		Del vostre gran tort,
	95	Sil platz, el Comte estorsa
		De vos e de mort!
XIII		Roma, bem conort     quez en abans de gaire
		Venrez a mal port,     si l’adreitz Emperaire
		Mena adreich sa sort     ni fai so que deu faire;
	100	Roma, eu dic ver
		Quel vostre poder
		Veirem dechazer:
		Roma, lo vers Salvaire
		M’o lais tost vezer!
XIV	105	Roma, per aver     faitz mainta vilania
		E maint desplazer     e mainta fellonia;
		Tant voletz aver     del mon la senhoria
		Que ren non temetz
		Dieu ni sos devetz;
	110	Ainz vei que fazetz
		Mais qu’ieu dir non poiria
		De mal, per un detz.
XV		Roma, tan tenetz     estreg la vostra grapa
		Que so que podetz     tener greu vos escapa;
	115	Sin breu non perdetz     poder, a mala trapa
		Es lo mons cazutz
		E mortz e vencutz,
		El pretz confondutz!
		Roma, la vostra Papa
	120	Fai aitals vertutz.
XVI		Roma, Cel qu’es lutz     del mon e vera vida
		E vera salutz     vos don mal’escarida,
		Car tans mals saubutz     faitz, per que lo mons crida,
		Roma desleials,
	125	Razitz de totz mals,
		Els focs enfernals
		Ardretz senes falhida,
		Si non penssatz d’als.
XVII		Roma, als cardenals     vos pot hom sobreprendre
	130	Per los criminals     pecatz que fan entendre,
		Que non pensan d’als     mas cum puoscan revendre
		Dieu et sos amics,
		E no i val castics;
		Roma, grans fastics
	135	Es d’auzir e d’entendre
		Los vostres prezics.
XVIII		Roma, eu sui enics     car vostre poders monta,
		E car grans destrics     totz ab vos nos afronta;
		Car vos etz abrics     e cap d’engan e d’onta
	140	E de deshonor;
		Eil vostre pastor
		Son fals trichador,
		Roma, e quils aconta
		Fai trop gran follor.
XIX	145	Roma, mal labor     fal Papa quan tensona
		Ab l’emperador     pel dreich de la corona
		Nil met en error     nils sieus gerriers perdona;
		Car aitals perdos
		Que non sec razos,
	150	Roma, non es bos;
		Enans qui l’en razona
		Reman vergonhos.
XX		Roma, ’l Glorios     que sofri mortal pena
		En la Crotz per nos     vos done mal’estrena,
	155	Car voletz totz jors     portar la borsa plena!
		Roma de mal for,
		Que tot vostre cor
		Avetz en tresor;
		Don cobeitatz vos mena
	160	El fuoc que no mor.
XXI		Roma, del malcor     que portatz en la gola
		Nais lo sucx don mor     lo mons e s’estrangola
		Ab doussor de cor;     per quel savis tremola,
		Quan conois e ve
	165	Lo mortal vere
		E de lai on ve;
		Roma, del cor vos cola
		Don li pieitz son ple.
XXII		Roma, ben ancse     a hom auzit retraire
	170	Quel caps sems vos te,     per quel faitz soven raire;
		Per que cug e cre     qu’ops vos auria traire,
		Roma, del cervel,
		Quar de mal capel
		Etz vos e Cistel,
	175	Qu’a Bezers fezetz faire
		Mout estranh mazel.
XXIII		Rom’, ab fals sembel     tendetz vostra tezura
		E man mal morsel     manjatz, qui que l’endura;
		Car’avetz d’anhel     ab simpla gardadura:
	180	Dedins lop robat,
		Serpen coronat
		De vibr’engenrat;
		Per quel diablens aura
		Comal sieu privat!