De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 236,011 Auteur: Guilhem de la Tor , o Palais Genre: Sirventes Numero: CXXXI

Un sirventes farai     d’una trista persona 

I	1	Un sirventes farai     d’una trista persona
		Qui mal fai e mal ditz     e mal met e mal dona
		E mal joga e mal ri     e mal parla e pieitz sona
		E plus en far tot mal     chascun jorn s’abandona;
	5	Per q’ieu de malvestat     vuoill que port la corona
		Sabetz cum el a nom?     Porc Armat de Cremona.
II		Grans causa es d’auzir     e fera descrezenssa
		Tot lo mal q’es en lui;     e la desconoissenssa,
		Don ja nois partra mais,     tant li platz e l’agenssa
	10	Q’anz volia esser mortz,     ses tota retenenssa,
		Q’el fezes negun faich     d’adreicha conoissenssa;
		Mas ab fols et ab orbs     es tota sa guirenssa.
III		E feing se mout cortes     e mena grand’ufana,
		Qand el a pro begut,     ab una de Breissana
	15	Q’es bella e gaia e pros     et a valor certana;
		Et ella volria anz,     sil tot de lieis si vana,
		Q’el jagues quatorze anz     de la febre quartana
		Q’ela il fos, si del tot     cum il volria, humana.
IV		Q’el mon dompna non a     c’om deja aver fianssa
	20	Que d’amor li fezes     mais negun’esperanssa,
		Pois eu l’agues comtat     sa fera malananssa,
		Sa fera escarsetat,     sa fera desonranssa,
		Ni puois de sos huoilz vi     sa fera enflada panssa,
		Ni son fer lechardetz,     ni sa fera semblanssa.
V	25	Enaissi es valors     del tot en lui perduda
		Que de pretz si depart     e largueza refuda
		E pren escarsetat     per amiga e per druda,
		Que s’era mout lonc temps     en s’amor entenduda,
		Et er a si de lui     sa voluntat aguda
	30	Que, per amor de lui,     corna la recrezuda.
VI		Als crois rics fatz saber     q’ant valor decazuda
		C’ab ma lenga, q’es plus     que rasors esmoluda,
		Lor farai derenan     guerra fort et aguda.