De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 282,024 Auteur: Lanfranc Cigala Genre: Deux coblas avec tornada Numero: CXXXVI

Tan franc cors de dompn’ai trobat 

I	1	Tan franc cors de dompn’ai trobat
		A Villafranca, e tan plazen
		Qe m’acuilli tan francamen
		Que de franc m’a son serf tornat;
	5	Mas franqueza com m’adui a servir,
		Qem deuria, s’eu era sers, franqir?
		Car pros dompna, ab sa franca douzor,
		Cor d’ome franc fai leu son servidor.
II		S’ieu agues ges de franqetat,
	10	Eu amera son franc cors gen;
		Mas no ai tan franc ardimen
		D’entendr’en tan franc’amistat;
		Mas son franc pretz sivals farai auzir
		Tan, qe mains francs farai sers devenir
	15	De lei, cui am francamen ad honor
		Ab fi cor franc, mas no en dreit d’amor.
		Dompna, jamais no voill francs devenir
		De vos amar francamen e servir;
		Q’eu fora fols, pois ai tan franc seignor,
	20	Si franqetat demandava major.